MLA Jagadish Reddy | హైదరాబాద్ : బీఆర్ఎస్ పార్టీ బీ ఫాంపై గెలిచి కాంగ్రెస్ పార్టీలో చేరిన పోచారం శ్రీనివాస్ రెడ్డి, డాక్టర్ సంజయ్ శాసనసభా సభ్యత్వాలను రద్దు చేయించి తీరుతామని సూర్యాపేట బీఆర్ఎస్ ఎమ్మెల్యే జగదీశ్ రెడ్డి స్పష్టం చేశారు. పార్టీ మారిన ఎమ్మెల్యేల మీద పిటిషన్ ఇవ్వాలని 2 రోజుల నుండి స్పీకర్ని కలవాలని చూస్తే స్పీకర్ అపాయింట్మెంట్ ఇవ్వడం లేదని జగదీశ్ రెడ్డి పేర్కొన్నారు. ఈ అంశంపై తెలంగాణ భవన్లో జగదీశ్ రెడ్డి మీడియాతో మాట్లాడారు.
బీఆర్ఎస్ బీ ఫాంపై గెలిచిన పోచారం శ్రీనివాస్ రెడ్డి, సంజయ్ బీఆర్ఎస్ను వీడి కాంగ్రెస్ పార్టీలో చేరారు. ఇది పూర్తిగా చట్ట విరుద్ధం. పార్టీ ఫిరాయింపుల నిరోధక చట్టం ఉన్నదని తెలిసీ కూడా పార్టీ మారడం అనేది సరైంది కాదు. చట్టం ప్రకారం వీరిద్దరి సభ్యత్వాలు కూడా రద్దు కావాల్సి ఉంది. బీఆర్ఎస్ పార్టీ నుంచి స్పీకర్కు పిటిషన్ ఇచ్చేందుకు నిన్నటి నుంచి ప్రయత్నం చేస్తున్నాం. నిన్న స్పీకర్తో స్వయంగా మాట్లాడాను. ఎప్పుడు పిలిచినా వస్తామని చెప్పాను. వెసులుబాటు చూసుకుని పిలుస్తాను అని చెప్పారు. రాత్రి 8 గంటలకు వేచి చూశాం. అయినా స్పీకర్ నుంచి పిలుపు రాలేదు. ఇవాళ ఉదయం నుంచి కూడా ప్రయత్నం చేస్తూనే ఉన్నాం. స్పీకర్ ఓఎస్డీ ఫోన్లో అందుబాటులోకి వచ్చారు. వికారాబాద్లో స్పీకర్ ఉన్నారని చెప్పారు. ఏ సమయానికి అపాయింట్మెంట్ ఇస్తారో చెప్పాలని అడిగాం. కానీ స్పీకర్ స్పందించడం లేదని జగదీశ్ రెడ్డి తెలిపారు.
ఇక తప్పని పరిస్థితుల్లో ఈ-మెయిల్తో పాటు స్పీడ్ పోస్టు ద్వారా పిటిషన్ స్పీకర్కు పంపాం. ఇదే సందర్భంలో శాసనసభ కార్యదర్శికి కూడా పంపించాం. స్పీకర్ ఎలాంటి చర్యలు తీసుకుంటారనే దానిబట్టి మా చర్యలు ఉంటాయి. చట్టపరంగా, న్యాయపరంగా మాకున్న అవకాశాలు వినియోగించుకుంటాం. ఇద్దరి సభ్యత్వాలు రద్దు చేయించడానికి అన్ని రకాల ప్రయత్నాలు చేస్తాం. చేయించి తీరుతాం అని జగదీశ్ రెడ్డి స్పష్టం చేశారు.