Harish Rao | హైదరాబాద్, జూలై 12 (నమస్తే తెలంగాణ): రాష్ట్రంలో కాంగ్రెస్ సర్కారు అధికారంలోకి రాగానే బ్రాహ్మణ సంక్షేమాన్ని పూర్తిగా విస్మరించిందని మాజీమంత్రి హరీశ్రావు విమర్శించారు. కేసీఆర్ సర్కార్ బ్రాహ్మణ పరిషత్తు ద్వారా అమలు చేసిన కార్యక్రమాలు దేశానికే ఆదర్శంగా నిలిచాయని, వాటిని కొనసాగించాలని డిమాండ్ చేశారు. ఈ మేరకు శుక్రవారం సీఎం రేవంత్రెడ్డికి బహిరంగ లేఖ రాశారు. ప్రభుత్వం బ్రాహ్మణ సంక్షేమాన్ని పూర్తిగా విస్మరించటంతో సంక్షేమ పరిషత్తు ద్వారా అమలు చేసే పథకాలు నిలిచిపోయాయని తెలిపారు. ఈ విషయంలో సీఎం స్పందించాలని డిమాండ్ చేశారు. రాష్ట్రంలోని పేద బ్రాహ్మణుల అభ్యున్నతికి ఆర్థిక తోడ్పాటును ఇవ్వాలనే సహృదయంతో కేసీఆర్ తెలంగాణ బ్రాహ్మణ సంక్షేమ పరిషత్తును ప్రారంభించారని గుర్తుచేశా రు. కాంగ్రెస్ ప్రభుత్వం అధికారంలోకి వచ్చాక పరిషత్తు పరిస్థితి అగమ్యగోచరంగా మారిందని అన్నారు. విద్య, స్వయం ఉపాధి, వేదవిద్యకు ప్రోత్సా హం కోసం అమలు చేసిన వివిధ పథకాలు ఆగిపోవడం విచారకరమని వెల్లడించారు.
రాష్ట్రంలో అసలు బ్రాహ్మణ పరిషత్తు ఉన్నట్టా? లేనట్టా? అన్న ఆందోళన బ్రాహ్మణుల్లో నెలకొన్నదని తెలిపారు. కేసీఆర్ నాయకత్వంలోని తమ ప్రభుత్వం బ్రాహ్మణ సంక్షేమ పరిషత్తు కోసం ఏటా రూ.100 కోట్లు క్రమం తప్పకుండా కేటాయించిందని గుర్తుచేశారు.స్వామి వివేకానంద పేరుతో విదేశీవిద్యానిధి పథకం, శ్రీరామానుజ పేరుతో ఫీజు రీయింబర్స్మెంట్ పథకం, వేదహిత పేరుతో వేద పాఠశాలలు, వేద విద్యార్థులకు ఆర్థిక సహాయం, ప్రతి నెల వేద శాస్త్ర పండితులకు గౌరవ వేతనం, ఔత్సాహిక పారిశ్రామిక, వ్యాపారవేత్తలకు ఆర్థికప్రోత్సాహం, బ్రాహ్మణ యువతకు పోటీ పరీక్షల శిక్షణ వంటి పథకాలను అమలుచేసి ఎంతోమంది పేద బ్రాహ్మణ కుటుంబాల్లో వెలుగులు నింపామని వివరించారు.
విదేశీవిద్యానిధి పథకం కింద 780 మంది పేద బ్రాహ్మణ విద్యార్థుల కోసం రూ.20 లక్షల చొప్పున కేసీఆర్ సర్కారు ఖర్చు చేసిందని, 436 మంది విద్యార్థులకు పోస్ట్మెట్రిక్ సాలర్షిప్స్ అందించిందని, ఔత్సాహిక పారిశ్రామికవేత్తలకు ప్రోత్సాహకంగా 5,074 మందిని గుర్తించి రూ.150 కోట్ల ఆర్థిక భరోసా కల్పించిందని తెలిపారు. బ్రాహ్మణుల గౌరవాన్ని పెంచేలా దేశంలోనే తొలిసారిగా, రంగారెడ్డి జిల్లా శేరిలింగంపల్లి మండలం గోపనపల్లిలో రూ.12 కోట్ల తో 10 ఎకరాల విస్తీర్ణంలో విప్రహిత బ్రాహ్మణ సదన్ నిర్మించి, బ్రాహ్మణ సంక్షేమంలో తెలంగాణను దేశానికే ఆదర్శంగా నిలిపినట్టు వెల్లడించారు. ఈ సందర్భంగా సర్కారు పరిష్కరించాల్సిన సమస్యలను లేఖలో ప్రస్తావించారు.
ఆ వివరాలివీ..