Harish Rao | సిద్దిపేట, మే 11 ( నమస్తే తెలంగాణ ప్రతినిధి): ‘రాష్ట్రంలో కాంగ్రెస్ సర్కారు వంద రోజుల్లో ఆరు గ్యారెంటీలు అమలుచేయకుండా ప్రజలను మోసగించింది. కొత్త పథకాలు అమలుకాకపోగా.. ఉన్న పథకాలు ప్రజలకు అందకుండా పోతున్నాయి. గ్యారెంటీలకే దిక్కు లేదు. కొత్తగా ఇచ్చే హామీలను ఎలా నమ్ముతారు’ అని మాజీ మంత్రి, సిద్దిపేట ఎమ్మెల్యే హరీశ్రావు ప్రశ్నించారు. పార్లమెంట్ ఎన్నికల్లో కాంగ్రెస్, బీజేపీ కంటే మెరుగైన సీట్లు బీఆర్ఎస్ సాధిస్తుందని ధీమా వ్యక్తం చేశారు. కేసీఆర్ బస్సుయాత్ర విజయవంతమైందని పేర్కొన్నారు. రాష్ట్రంలో ఏం జరుగుతుందో రాహుల్గాంధీకి అవగాహన లేదని, రేవంత్రెడ్డి ఏది రాసిస్తే దానిని చదువుతున్నారని విమర్శించారు. పలు అంశాలపై హరీశ్రావు ‘నమస్తే తెలంగాణతో ప్రత్యేకంగా’ మాట్లాడారు. ఆయన మాటల్లోనే..
ఉదయ్పూర్ డిక్లరేషన్లో ప్యారాచూట్ నేతలను తిరిగి పార్టీలోకి తీసుకోబోమని కాంగ్రెస్ స్పష్టంగా చెప్పింది. కానీ, రాష్ట్రంలో ప్యారాచూట్ నేతలకే పెద్దపీట వేశారు. మెదక్లో నీలం మధు, వరంగల్లో కడియం కావ్య, మల్కాజిగిరిలో సునీతామహేందర్రెడ్డి, చేవెళ్లలో రంజిత్రెడ్డి వీళ్లంతా ప్యారాచూట్ నేతలు. కరీంనగర్, ఖమ్మం, ఆదిలాబాద్లో కొత్త వారిని తీసుకొచ్చారు. అసలైన కాంగ్రెస్ నాయకులు బాధపడుతున్నారు. పార్టీ కోసం కష్టపడిన వారికి మోసం జరిగిందని కోపంగా ఉన్నారు. మెదక్లో టికెట్ పొందిన వ్యక్తి గతంలో కాంగ్రెస్ జెండాలు తగలబెట్టాడు. జనాభా ప్రాతిపాదికన రిజర్వేషన్లు, టికెట్లు ఇస్తామని చెప్పారు. పార్లమెంట్ ఎన్నికల్లో ఎంతమంది బీసీలకు టికెట్లు ఇచ్చారు? బీఆర్ఎస్ ఐదుగురికి ఇచ్చి న్యాయం చేసింది.
వంద రోజుల్లోనే ఆరు గ్యారెంటీలు అమలుచేయించే బాధ్యత నాది అని రాహుల్గాంధీ గత అసెంబ్లీ ఎన్నికల ముందు చెప్పారు. 150 రోజులు అవుతున్నా ఒక్క రోజు రివ్యూ చేయలేదు. పార్లమెంట్ ఎన్నికల ముందు వచ్చి కొత్త హామీలు ఇస్తున్నారు. ఇచ్చిన గ్యారెంటీలకే దిక్కు లేదు. కొత్త హామీలను తెలంగాణ ప్రజలు ఎలా నమ్ముతారు? నిర్మల్ సభలో రాహుల్ మాట్లాడుతూ మహిళలకు 2,500 ఇచ్చామని అంటాడు.. ఆరు గ్యారెంటీలు అమలు చేశామని చెప్తాడు. రేవంత్రెడ్డి ఏది రాసిస్తే దానిని చదివిపోతున్నారు. ఫలితంగా రాహుల్గాంధీ అభాసుపాలయ్యారు. రాహుల్గాంధీ తప్పు మాట్లాడితే ప్రజలకు క్షమాపణ చెప్పాలి. రేవంత్రెడ్డి సమక్షంలో రాహుల్అబద్ధాలు చెప్పారు. 2,500 ఇవ్వలేదని రేవంత్రెడ్డి చెప్పాలి కదా..? అంటే ఇద్దరు కూడబలుక్కొని అవాస్తవాలు చెప్తున్నారు.
గ్రామ పంచాయతీ వర్కర్లకు నాలుగు నెలలుగా వేతనాలు లేవు. పల్లె ప్రగతి అటకెక్కింది. పట్టణ ప్రగతి మూలకు పడింది. అన్ని వర్గాలను కాంగ్రెస్ మోసం చేసింది. ఉద్యోగులకు నాలుగు డీఏలు పెండింగ్లో పెట్టింది. అధికారంలోకి రాగానే పెండింగ్లో ఉన్న మూడు డీఏలు రేపే ఇస్తామని రేవంత్రెడ్డి ఉద్యోగ సంఘాలతో మీటింగ్ పెట్టి చెప్పి ఇంతవరకు ఇయ్యలేదు. రైతు బంధు అడిగితే చెప్పుతో కొడతామంటుండ్రు. గాలిలో ఉన్న నాయకులను భూమి మీదికి తేవాలంటే పార్లమెంట్ ఎన్నికల్లో ఆ పార్టీని ఓడించాలి.
కాంగ్రెస్ ప్రభుత్వం రివర్స్ గేర్లో నడుస్తున్నది. వ్యవసాయానికి 24 గంటల కరెంట్ నుంచి 18 గంటలకు వచ్చింది. వ్యవసాయ మోటర్లు కాలుతున్నాయి. పంటలు ఎండిపోతున్నాయి. కేసీఆర్ కిట్టు, న్యూట్రిషన్ కిట్టు బంద్. కల్యాణలక్ష్మి, షాదీముబారక్ చెక్కులు ఆలస్యం.. రైతులు, చేనేత కార్మికులు, ఆటో కార్మికుల ఆత్మహత్యలు నిత్యకృత్యమయ్యాయి. కేసీఆర్ హయాంలో సకాలంలో రైతుబంధు వచ్చింది. ఇప్పడు ఎందుకు ఆలస్యం అవుతున్నది..? సకాలంలో వడ్లు కొనక దళారులకు రూ.1,900కు రైతులు అమ్ముకుంటున్నారు. వడ్లకు తరుగు పెట్టిన కాంగ్రెస్కు ఓట్లల్లో తరుగు పెట్టాలి .
కాంగ్రెస్ ప్రభుత్వం గీత కార్మికుల ఉసురు పోసుకుంటుంది. చంచల్గూడ జైలులో ఒక బ్యారెక్ నిండా గీత కార్మికులే ఉన్నారు. కేసీఆర్ హయాంలో గీత కార్మికుల మీద ఒక్క కేసు లేదు. 450 మందికిపైగా ఆర్ఎంపీలను జైళ్లల్లో పెట్టిన్రు. రైస్మిల్లులపై దాడులు చేస్తున్నరు. వ్యాపారస్తులు, వైశ్యుల మీద తూనికల కొలతల అధికారులు దాడులు చేస్తున్నరు. పొల్యూషన్ కంట్రోల్ బోర్డు అధికారులు కంపెనీలను, పారిశ్రామికవేత్తలను భయపెట్టించి వసూళ్లకు పాల్పడుతున్నరు. ప్రతిపక్ష నాయకులమీద ప్రతీకారం తీర్చుకుంటున్నరు.
బీజేపీకి నలుగురు ఎంపీలు గెలిచినా, కేంద్ర మంత్రి కిషన్రెడ్డి ఉన్నా.. తెలంగాణకు వీళ్లు తెచ్చింది గుండు సున్న. వాళ్లు గెలిచినా చేసేదేమీ లేదు. 28 రాష్ర్టాల్లో ఏ ముఖ్యమంత్రీ కేసీఆర్ లాగా వెయ్యి కోట్లతో అద్భుతమైన యాదాద్రి ఆలయం కట్టియ్యలేదు. శతచండీహోమం చేసిండు. రామాలయాన్ని ట్రస్టు కట్టింది. బీజేపీ కట్టలే. బీజేపీ కార్పొరేట్లకు 14 లక్షల కోట్లు మాఫీ చేస్తే, కర్షకులకు నయాపైసా మాఫీ చేయలేదు. పేదల ప్రయోజనాలకు విరుద్ధగా పనిచేసే పార్టీ బీజేపీ.
కాంగ్రెస్ వచ్చినంక రియల్ ఎస్టేట్ కుదేలైపోయి లక్షల మంది ఏజెంట్ల జీవితాలు రోడ్డున పడ్డాయి. రేవంత్రెడ్డి గత ప్రభుత్వం మీద బురదజల్లాలనే ఉద్దేశంతో లేని అప్పులను చూపించి రాష్ట్రాన్ని దివాళా తీయిస్తున్నడు. రాష్ర్టానికి పెట్టుబడులు రాకుండా పోయాయి. ఉద్యోగాల కల్పన ఆగిపోయింది. రియల్ ఎస్టేల్ ఏజెంట్లు ఆత్మహత్యలు చేసుకొనే పరిస్థితి వచ్చింది. చేనేత కార్మికులకు రూ.350 కోట్ల పెండింగ్ ఉంది. సిరిసిల్లలో ఆత్మహత్యలు మొదలైనవి. హైండ్లూమ్ వర్కర్స్ పేమెంట్ ఆగిపోయినయ్. పాలుపోసే రైతులకు మూడు నెలలుగా బిల్లులు వస్తలేవు. కేసీఆర్ ఉన్నప్పుడు వారం వారం వచ్చేది.
కాంగ్రెస్, బీజేపీల కంటే మెరుగైన సీట్లు బీఆర్ఎస్ సాధిస్తుంది. కేసీఆర్ పర్యటన విజయవంతమైంది. రాహుల్గాంధీ సభ జనం లేక వెలవెలబోయింది. జనం కోసం 45 నిమిషాలు బస్సులో రాహుల్గాంధీ బ్రేక్ చేసిండు. రేవంత్రెడ్డి రోడ్డు మీదికి వచ్చి జనాన్ని లోపలికి రండి అంటూ బతిలాడుకున్నడు. చివరికి 10 నిమిషాలు మాట్లాడి వెళ్లిపోయిండు. చేవెళ్ల, మల్కాజిగిరి, సికింద్రాబాద్ మూడు పార్లమెంట్లు కలిపితే కూడా 3 వేల మంది రాలె. ప్రజలు కాంగ్రెస్ను తిరిస్కరిస్తున్నారనడానికి రాహుల్ సభే నిదర్శనం. బీజేపీ రాష్ర్టానికి ఒక్క జాతీయ ప్రాజెక్టు, మెడికల్ కాలేజ్, నర్సింగ్ కాలేజ్ కూడా ఇయ్యలేదు. ఈ రాష్ర్టానికి విభజన హామీలు అమలు చేయలేదు. అడుగడుగునా రాష్ర్టానికి అన్యాయం చేసిన బీజేపీకి గుణపాఠం చెప్పాలని ప్రజలు అనుకుంటున్నరు. అందువల్ల ఖచ్చితంగా ఈ సారి బీఆర్ఎస్ పార్టీ శాసన సభ ఎన్నికల కంటే కూడా మెరుగైన ఫలితాలు సాధిస్తుందని నమ్మకం ఉన్నది. కేసీఆర్ బస్సు యాత్రకు ప్రజాదరణనే మేము మెరుగైన ఫలితాలు సాధిస్తామనడానికి నిదర్శనం.
రేవంత్రెడ్డిది దుష్ప్రచారం. ఇచ్చిన 30 వేల ఉద్యోగాల్లో ఒక్క నోటిఫికేషనన్న ఇచ్చారా..? ఒక్కదానికైన పరీక్ష పెట్టారా.. ? నోటిఫికేషన్ ఇచ్చింది.. పరీక్ష పెట్టింది.. ఫలితాలు ఇచ్చింది.. సర్టిఫికెట్లు వెరిఫై చేసింది బీఆర్ఎస్ ప్రభుత్వమే..రేవంత్రెడ్డి కేవలం ఆర్డర్ కాపీనే ఇచ్చావ్. ఎనుకటికి అంత వంట వండి పెట్టినంక ఎవడో వడ్డించడానికి వచ్చి అంతా నేనే చేసిన అన్నాడట. నిరుద్యోగ భృతి ఇస్తా అని నిండు అసెంబ్లీలో చెప్పినవు.. నిరుద్యోగభృతి ఇస్తామని హామీ ఇవ్వలేదు అని స్వయంగా డిప్యూటీ సీఎం ఆర్థిక మంత్రి చేతులేత్తేసిండు.
రేవంత్రెడ్డి నా సవాల్ స్వీకరించడం లేదు. వందరోజుల్లో అమలు చేస్తానన్న 6 గ్యారెంటీలు, 2 లక్షల రుణమాఫీ ఇవన్నీ పంద్రాగస్టులోగా చేస్తే నేను రాజీనామాకు సిద్ధమన్న. అసలు నువ్వు దానికి సిద్ధమా? కాదా? నువ్వు ఇంత వరకు ముందుకు రాలేదు. నువ్వు రాజీనామా పత్రం పెట్టు.. నేను పెడుత.. అంటే పెట్టలేదు.. అంటే నా సవాల్ స్వీకరించనే లేదు. దేవుళ్ల మీద ఓట్లు పెట్టి ప్రజలను మభ్యపెట్టుడెందుకు.. ఇద్దరం రాజీనామాలు పెడుదామని నేను సవాల్ విసిరిన. ఆ సవాల్ నువ్వు స్వీకరించినవా లేదా..? నువ్వు స్వీకరించలేదు అంటే ఆగస్టు 15లోగా 6 గ్యారెంటీలు, రుణమాపీ చెయ్యవు అని ప్రజలు అర్థం చేసుకుంటున్నరు.