హైదరాబాద్, జూలై 16 (నమస్తే తెలంగాణ): రుణమాఫీకి ప్రభుత్వం విధించిన షరతులను ఉపసంహరించుకోవాలని, రుణం తీసుకున్న రైతులు అందరికీ రుణమాఫీ చేయాలని మాజీ మంత్రి, బీఆర్ఎస్ నేత టీ హరీశ్రావు డిమాండ్ చేశారు. షరతులు విరమించుకోకపోతే పెద్ద ఎత్తున ప్రజాపోరాటం చేస్తామని, అసెంబ్లీని స్తంభింపజేస్తామని హెచ్చరించారు. రుణం తీసుకునేటప్పుడు లేని రేషన్కార్డు నిబంధన ఇప్పుడు ఎందుకని ప్రశ్నించారు. పట్టాదారు పాస్బుక్ ఆధారంగానే రుణమాఫీ చేయాలని డిమాండ్ చేశారు. కాంగ్రెస్ మ్యానిఫెస్టోలో చెప్పినట్టుగా రుణమాఫీ చేయాలని, అమలు చేసే దాకా అయ్యే వడ్డీని కూడా ప్రభుత్వమే భరించాలని కోరారు. మంగళవారం ఆయన అసెంబ్లీ మీడియా హాల్లో మాట్లాడుతూ.. ఎన్నికల సమయంలో ప్రతి రైతుకూ రుణమాఫీ చేస్తామని చెప్పిన రేవంత్రెడ్డి మాట తప్పారని విమర్శించారు.
రాష్ట్రంలో చేతల పాలన పోయి షరతుల పాలన వచ్చిందని ఎద్దేవా చేశారు. పీఎం కిసాన్ నిబంధనలు అమలు చేస్తే సగం మంది రైతులు రుణమాఫీకి దూరం అవుతారని ఆందోళన వ్యక్తంచేశారు. రుణమాఫీపై ప్రభుత్వ నిబంధనలు చూస్తే, రైతుల వలపోతల కంటే వడపోతలపైనే ఎక్కువ దృష్టి పెట్టినట్టుగా ఉన్నదని మండిపడ్డారు. ఎన్నికల ముందు కుటుంబానికి ఒకరికే, రేషన్కార్డు ఉన్నవారికే రుణమాఫీ అని చెప్పి ఉంటే రైతులే తీర్పు చెప్పేవారని పేర్కొన్నారు. రుణమాఫీ చేయడానికి రైతా? కాదా? భూమి ఉన్నదా? లేదా? అనేది మాత్రమే చూడాలని డిమాండ్ చేశారు. రుణమాఫీ మార్గదర్శకాలు బంగారంపై అప్పులు ఇచ్చే వాటి కంటే దారుణంగా ఉన్నాయని మండిపడ్డారు. ఆధార్కార్డు, రేషన్కార్డు ప్రాతిపదికన రుణమాఫీ సరికాదని అభ్యంతరం వ్యక్తంచేశారు. గతంలో బీఆర్ఎస్ ప్రభుత్వం ఎలాంటి షరతులు పెట్టలేదని, రూ.లక్ష రుణమాఫీ చేసిందని గుర్తుచేశారు.
రేషన్కార్డుతో లింక్ పెట్టడం అంటే కుటుంబంలో కొట్లాట పెట్టుడేనని హరీశ్రావు ఆగ్రహం వ్యక్తంచేశారు. సంసారం వేరుపడ్డా రేషన్కార్డు ఒకటే ఉంటుందని, రేషన్కార్డులో విడిపోనం త మాత్రాన అర్హులు కాకుండా పోతారా? అని ప్ర శ్నించారు. తండ్రికి రుణమాఫీ చేస్తాం, కొడుకుకు చేయం అంటే వారి మధ్య కొట్లాట పెట్టినట్టేనని స్పష్టంచేశారు. ప్రజాపాలనలో రేషన్కార్డుల కోసం దరఖాస్తులు చేసుకున్నవారికి ఏడు నెలలైనా కార్డులు ఇవ్వలేదని గుర్తుచేశారు. కార్డు లేదని రుణమాఫీ చేయకపోవడం దగా చేయడం కాదా? అని నిలదీశారు.
పీఎం కిసాన్ డాటాను పరిగణనలోకి తీసుకోవడం అంటే సగానికి సగం రైతులకు రుణమాఫీ ఎగ్గొట్టినట్టేనని స్పష్టం చేశారు. రైతుబంధు కింద 68,99,079 మంది రైతులు లబ్ధి పొందితే, పీఎం కిసాన్ ద్వారా 30.36 లక్షల మందికే లబ్ధి కలుగుతున్నదని చెప్పారు. ఈ లెక్కన 39 లక్షల మందిని రుణమాఫీకి దూరం చేయడమేనని మండిపడ్డారు. రైతుబంధు కింద ఏడాదికి ఇచ్చింది రూ.15,248 కోట్లు అయితే, పీఎం కిసాన్ కింద ఇచ్చేది రూ.1,821 కోట్లు మాత్రమేనని తెలిపారు. అటు పీఎం ఇయ్య డు.. ఇటు సీఎం ఇయ్యడు, బడేభాయ్ బాటలో చోటే భాయ్ నడుస్తున్నాడని ఎద్దేవా చేశారు.
ఐటీ కట్టే వారితోపాటు ఆర్టీసీ, సింగరేణి, నాలుగో తరగతి ఉద్యోగులు, రిటైర్డ్ ఉద్యోగులు, ఉపాధ్యాయులు, పెన్షనర్లు కూడా పీఎం కిసాన్కు అనర్హులు అని, వీరందరూ రుణమాఫీకి అనర్హులా? అని నిలదీశా రు. రూ.2 లక్షలకు పైగా రుణం తెచ్చుకున్న రైతులు, రూ.2 లక్షలకు పైబడిన మొత్తాన్ని చెల్లిస్తేనే రుణమాఫీ చేస్తామంటే, అది తీర్చడానికి మళ్లీ బయట రూ.3 వడ్డీకి అప్పు తెచ్చికోవాల్సిన పరిస్థితి వస్తుందని ఆందోళన వ్యక్తంచేశారు. ‘అప్పు కట్టేందుకు అప్పు తెచ్చుకో’ అన్నట్టుగా ప్రభుత్వం తీరు ఉన్నదని మండిపడ్డారు. కాంగ్రెస్ ప్రభుత్వం వచ్చాక నీళ్లు లేక పంటలు పండలేదని, రైతుభరోసా ఇవ్వలేదని ఇలాంటి సమయంలో అప్పు కట్టు అనడం తీవ్రమైన అన్యాయమని ఆగ్రహం వ్యక్తంచేశారు. రుణమాఫీ పథకం స్వల్పకాలిక పంట రుణాలకు మాత్రమే వర్తిస్తుందనడం దారుణమని మండిపడ్డారు. దీర్ఘకాలిక పంటలకు లేదంటే బత్తాయి, మామిడి, ఆయిల్ పాం లాంటి పంటలకు రుణమాఫీ వర్తించదని చెప్పారు. దీంతో రాష్ట్రంలో దాదాపు పది లక్షల ఎకరాలకు రుణమాఫీ లేనట్టేనని స్పష్టం చేశారు.
రీ షెడ్యూల్ చేసుకున్న వారికి రుణమాఫీ వర్తించదని చెప్పడం దారుణమని హరీశ్రావు మండిపడ్డారు. తీవ్రంగా రైతులు నష్టపోయినప్పుడు, కరువు పరిస్థితులు ఉన్నప్పుడు, వరదలు వచ్చి పంటలు కొట్టుకుపోయినప్పుడు రీ షెడ్యూల్ చేయాలని రైతు లు అడగకపోయినా ప్రభుత్వం, బ్యాంకులే రీ షె డ్యూల్ చేస్తాయని చెప్పారు. ప్రభుత్వం చేసిన పనికి రైతులకు ఎందుకు శిక్ష? అని ప్రశ్నించారు. అప్పులు కట్టిన వారికి మొండిచేయి చూపడం సరికాదని పేర్కొన్నారు. జేఎల్జీ, ఎస్హెచ్జీ, ఎఫ్పీవో వారికి రుణమాఫీ చేయం అన్నారని, ఈ గ్రూపుల్లో చిన్న రైతులు ఉంటారని, గ్రూపుగా ఏర్పడి పంటలు పండిస్తారని వివరించారు. రుణమాఫీకి స్టార్టింగ్ డేట్ ఉండదని, ఎండింగ్ డేట్ మాత్రమే ఉంటుందని, బీఆర్ఎస్ ప్రభుత్వం కూడా అలాగే చేసిందని చెప్పారు. కానీ కాంగ్రెస్ ప్రభుత్వం 2018 డిసెంబర్ 12 కంటే ముందు తీసుకున్న రుణాలకు వర్తించదు అని చెప్పడం అన్యాయమని పేర్కొన్నారు.
అసలు, వడ్డీ కలిపి రెండు లక్షలు మాఫీ చేస్తమన్నారని, కానీ కాంగ్రెస్ అధికారంలోకి వచ్చాక డిసెంబర్ 9 నాడే మాఫీ చేస్తాం అన్నారని, డిసెంబర్ నుంచి మాఫీ అయ్యే వరకు పడిన వడ్డీ ఎవరు భరించాలని హరీశ్రావు ప్రశ్నించారు. రైతులు ఇచ్చే సమాచారానికి, తప్పులకు వారే బాధ్యులంటూ రైతులను బెదిరించే ప్రయత్నం చేశారని మండిపడ్డారు. గతంలో సీఎం మాట్లాడుతూ.. రేషన్కార్డు ప్రామాణికం కాదు అన్నారని, నాలుగు రోజుల తర్వాత రేషన్కార్డే ప్రామాణికం అంటున్నారని మండిపడ్డారు. రుణమాఫీకి షరతులు పెట్టి, వ్యాపారంలో చేసినట్టుగా రైతుల పట్ల ప్రభుత్వం వ్యవహరిస్తున్నదని దుయ్యబట్టారు.
బాండ్ పేపర్ మీద రాసిచ్చిన ఆరు గ్యారెంటీలు, 13 హామీలు సహా ఆగస్టు 15లోగా రుణమాఫీ చేస్తే రాజీనామా చేస్తానని హరీశ్రావు మరోసారి స్పష్టంచేశారు. దానికి కట్టుబడి ఉన్నానని పేర్కొన్నారు. తన కు ఎమ్మెల్యే పదవి ముఖ్యం కాదని స్పష్టంచేశారు. కొండనాలుక మందేస్తే ఉన్న నాలుక పోయినట్టుగా పరిస్థితి తయారైందని, ఎకరాకు రూ.7,500 రైతు భరోసా, నాలుగు వేల పింఛన్ అమలు చేయకపో గా, రెండు వేల పింఛన్ కూడా ఇవ్వడం లేదని విమర్శించారు. మహిళలకు నెలకు రూ.2,500, పేదలకు డబుల్ బెడ్రూం ఇల్లు, విద్యార్థి భరోసా కార్డు ఇస్తే అప్పుడు తన పదవికి రాజీనామా చేస్తానని ప్రకటించారు. పదవిలో ఉన్నామని గొంతు చించుకొని మా ట్లాడితే లాభం లేదని చురకలేశారు.
ఎంతమందికి ఉచిత కరెంట్, గ్యాస్ ఇచ్చారని ప్రశ్నించారు. రాష్ట్రం లో రైతు ఆత్మహత్య లేని రోజు లేదని, 400 పై చిలు కు రైతులు ఆత్మహత్యలు చేసుకున్నారని ఆవేదన వ్యక్తంచేశారు. ఆ వివరాలు పంపితే రైతులకు పరిహారం ఇస్తామని సీఎం అన్నారని, కానీ ఆ వివరాలు పంపితే ఎలాంటి స్పందన లేదని మండిపడ్డారు. ప్రభుత్వం రైతులకు భరోసా ఇవ్వడంలో విఫలమవుతున్నదని దుయ్యబట్టారు. సమావేశంలో మాజీ స్పీకర్ మధుసూదనాచారి, మాజీ మంత్రులు సునీ తా లక్ష్మారెడ్డి, వేముల ప్రశాంత్రెడ్డి, ఎమ్మెల్యే ప్రభాకర్, సంజయ్కుమార్, వివేకానంద్ పాల్గొన్నారు.
బీఆర్ఎస్ ప్రభుత్వ హయాంలో మొదటి విడతలో 35.31 లక్షల మంది రైతులకు రూ.16,144 కోట్లు, రెండో విడతలో 22.98 లక్షల మంది రైతులకు రూ.13 వేల కోట్ల చొప్పున మొత్తం రూ.29,144 కోట్లు రుణమాఫీ చేశామని హరీశ్రావు వివరించారు. ఇప్పుడు ఇన్ని నిబంధనలు పెట్టి రుణమాఫీ ఎగ్గొట్టే ప్రయత్నం చేస్తున్నారని మండిపడ్డారు.
హైదరాబాద్, జూలై 16 (నమస్తే తెలంగాణ): రైతు రుణమాఫీకి పాస్బుక్నే ప్రామాణికంగా తీసుకోవాలని మాజీ మంత్రి హరీశ్రావు డిమాండ్ చేశారు. ఆరోగ్యశ్రీకి ఏ సూత్రాన్ని అయితే పాటిస్తున్నారో అదే సూత్రాన్ని రైతు రుణమాఫీకి వర్తింపచేయాలన్నారు. రేషన్కార్డుకు ఆరోగ్యశ్రీకి లింకు పెట్టొద్దని సీఎం రేవంత్రెడ్డి అధికారులకు ఆదేశాలు జారీ చేసిన నేపథ్యంలో హరీశ్రావు ఎక్స్లో స్పందించారు. ఇదే విధానాన్ని రైతు రుణమాఫీకి పాటిస్తే బాగుంటుందని తెలిపారు.