తిరుమలాయపాలెం, జూలై 16 : వేతనాల కోసం మిషన్ భగీరథ కార్మికులు ఆందోళనకు దిగారు. ఖమ్మం జిల్లా తిరుమలాయపాలెం మండలం దమ్మాయిగూడెంలో మంగళవారం మిషన్ భగీరథ కార్యాలయం వద్ద కార్మికులు బైఠాయించారు. ఏజెన్సీ కంపెనీ ఎల్అండ్టీ వారు నాలుగు నెలలుగా వేతనాలు ఇవ్వకుండా ఇబ్బందులకు గురిచేస్తున్నట్టు ఆవేదన వ్యక్తంచేశారు.
అక్కడికి వచ్చిన ఎల్అండ్టీ కంపెనీ జిల్లా మేనేజర్ ఎల్కే రెడ్డి, ఇద్దరు అధికారులను కార్యాలయ ఆవరణలో నిర్బంధించారు. కార్మికులకు ప్రభుత్వం నెలకు రూ.19 వేల జీతం ఇస్తుంటే ఎల్అండ్టీ కంపెనీ, అధికారులు కుమ్మక్కై రూ.13 వేలు మాత్రమే ఇస్తున్నారని వాపోయారు. జీతాల చెల్లింపుపై స్పష్టమైన హామీ ఇవ్వాలని మేనేజర్ను నిలదీశారు.
ప్రభుత్వం నుంచి కంపెనీకి బిల్లులు వచ్చేవరకు స్పష్టత ఇవ్వలేమని మేనేజర్ వారికి తెలిపారు. దీంతో వేతనాలు ఇచ్చేవరకు విధులను బహిష్కరిస్తామని వారు ప్రకటించారు. విషయం తెలుసుకున్న తిరుమలాయపాలెం ఎస్సై గిరిధర్రెడ్డి సిబ్బందితో అక్కడికి చేరుకొని కార్మికులతో మాట్లాడటంతో మేనేజర్, అధికారులను వదిలేశారు. మిషన్ భగీరథ కార్మికులు విధులను బహిష్కరించడంతో మండలంలో తాగునీటి సరఫరా నిలిచిపోయింది.