హైదరాబాద్, జూలై 17 (నమస్తే తెలంగాణ): మేడిగడ్డ బరాజ్ రక్షణ కోసం చేపట్టాల్సిన చర్యలపై ఈ నెల 20న ఢిల్లీలో నేషనల్ డ్యామ్ సేఫ్టీ అథారిటీ (ఎన్డీఎస్ఏ) అధికారులతో ప్రత్యేకంగా సమావేశమై చర్చించనున్నట్టు రాష్ట్ర సాగునీటి పారుదల శాఖ మంత్రి ఉత్తమ్ కుమార్రెడ్డి వెల్లడించారు. సమ్మక్క బరాజ్ అనుమతుల కోసం త్వరలో ఛత్తీస్గఢ్ ప్రభుత్వంతో సంప్రదింపులు జరుపనున్నట్టు తెలిపారు. రాష్ట్రంలోని సాగునీటి ప్రాజెక్టుల పురోగతి, ఆ పనులను పూర్తి చేసేందుకు కావాల్సిన బడ్జెట్, తదితర అంశాలపై బుధవారం ఆయన జలసౌధలో ఇరిగేషన్ శాఖ ఉన్నతాధికారులతో ప్రత్యేక సమీక్షా సమావేశాన్ని నిర్వహించారు.
అనంతరం విలేకరుల సమావేశంలో మంత్రి ఉత్తమ్ కుమార్రెడ్డి మాట్లాడుతూ.. కృష్ణా బేసిన్ పరిధిలోని పాలమూరు-రంగారెడ్డి, కోయిల్సాగర్, జేఎన్ఎల్ఐఎస్, డిండి, ఎస్ఎల్బీసీ, నెట్టెంపాడు, భీమా, కల్వకుర్తి ప్రాజెక్టులతోపాటు గోదావరి బేసిన్ పరిధిలోని చిన్న కాళేశ్వరం, నీల్వాయి, పాలెంవాగు, మత్తడివాగు, ఎస్ఆర్ఎస్పీ ఫేజ్-2, చనాకా కోరాట, లోయర్ పెన్గంగా, దేవాదుల, మోడికుంటవాగు, ఎస్వైపీ, సీతారామ ప్రాజెక్టుల పురోగతిపై సమగ్రంగా చర్చించినట్టు తెలిపారు.
సాగునీటి ప్రాజెక్టుల నిర్మాణాన్ని వేగవంతం చేసేందుకు ఇరిగేషన్ శాఖ ప్రత్యేక ప్రణాళికలతో ముందుకుసాగుతున్నట్టు చెప్పారు. ఉమ్మడి మహబూబ్నగర్ జిల్లాలోని అన్ని ప్రాజెక్టుల నిర్మాణాన్ని 2025 డిసెంబర్ నాటికి పూర్తి చేసేందుకు చర్యలు చేపట్టినట్టు తెలిపారు. ఈ నేపథ్యంలో నీటిపారుదల శాఖకు అదనంగా మరో రూ.11 వేల కోట్ల బడ్జెట్ అవసరమవుతుందని, ఆ నిధుల కోసం సీఎం రేవంత్రెడ్డితోపాటు ఆర్థిక శాఖకు ప్రతిపాదనలను పంపాలని నిర్ణయించామని వివరించారు. సకాలంలో ఈ ప్రాజెక్టులను పూర్తిచేయడం ద్వారా తొలుత 6.50 లక్షల ఎకరాలను సాగులోకి తేవాలని లక్ష్యంగా పెట్టుకున్నామని, అందులో భాగంగా ఆయా ప్రాజెక్టుల నిర్మాణాలను ప్రాధాన్య క్రమంలో 3 క్యాటగిరీలుగా విభజించామని తెలిపారు.
‘ఏ’ క్యాటగిరీలో రూ.240.66 కోట్లతో 47,882 ఏకరాల ఆయకట్టు సాగులోకి వస్తుందని చెప్పారు. రూ.7,500 కోట్ల అంచనా వ్యయంతో ప్రస్తుతం నిర్మిస్తున్న ప్రాజెక్టుల ద్వారా 5,84,770 ఎకరాల ఆయకట్టును సాగులోకి తీసుకురానున్నట్టు తెలిపారు. నిర్మల్ జిల్లాలోని సదర్మాట్ ప్రాజెక్టును ఈ నెలాఖరున, ఖమ్మం జిల్లాలోని సీతారామ ప్రాజెక్టులో భాగమైన రాజీవ్ కెనాల్ను ఆగస్టు 15న సీఎం రేవంత్రెడ్డి ప్రారంభించనున్నట్టు వెల్లడించారు. సమీక్షా సమావేశంలో నీటి పారుదల శాఖ కార్యదర్శి రాహు ల్ బొజ్జ, అదనపు కార్యదర్శి ప్రశాంత్ జీవన్ పాటిల్, ఇరిగేషన్ సలహాదారు ఆదిత్యనాథ్ దాస్, ఈఎన్సీ అనిల్ కుమార్, పీఅండ్ఎం ఎస్ఈ శ్రీనివాస్ తదితరులు పాల్గొన్నారు.