ఖమ్మం, జూన్ 4 (నమస్తే తెలంగాణ ప్రతినిధి): ఆంధ్రప్రదేశ్లో జరిగిన శాసనసభ, పార్లమెంట్ ఎన్నికల్లో తెలుగుదేశం పార్టీ ఘన విజయం సాధించిన సందర్భంగా ఖమ్మంలో టీడీపీ శ్రేణులు మంగళవారం విజయోత్సవ ర్యాలీలు నిర్వహించాయి. టీడీపీ నాయకులు, కార్యకర్తలు నగరంలోని పలు ప్రాంతాల్లో ప్రదర్శనలు నిర్వహించి ర్యాలీగా పార్టీ కార్యాలయానికి చేరుకుంటుండగా.. అటువైపు నుంచి వెళ్తున్న రాష్ట్ర వ్యవసాయ శాఖ మంత్రి తుమ్మల నాగేశ్వరరావు వారిని గమనించి టీడీపీ కార్యాలయానికి వెళ్లారు.
ఆంధ్రప్రదేశ్లో టీడీపీ విజయం సాధించడం అభినందనీయమని పార్టీ శ్రేణులను తుమ్మల ప్రత్యేకంగా అభినందించారు. నాయకులతో కరచాలనం చేసి కొద్దిసేపు ముచ్చటించారు. తుమ్మలను చూసిన టీడీపీ శ్రేణులు రెట్టించిన ఉత్సాహంతో నినాదాలు చేశాయి. పార్టీ కార్యాలయంలోకి ఆయనను సాదరంగా ఆహ్వానించాయి.