హైదరాబాద్, జూలై 22 (నమస్తే తెలంగాణ): జీవో నంబర్ 317 అమలులో ఏర్పడిన సమస్యలను వెంటనే పరిషరించాలని క్యాబినెట్ సబ్ కమిటీ సభ్యులైన మంత్రులు దామోదర రాజనర్సింహ, శ్రీధర్బాబు, పొన్నం ప్రభాకర్కు పీఆర్టీయూ టీఎస్ విజ్ఞప్తిచేసింది. సోమవారం ఆ సంఘం రాష్ట్ర అధ్యక్షుడు పింగిలి శ్రీపాల్రెడ్డి, ప్రధాన కార్యదర్శి బీరెల్లి కమలాకర్రావు, ఎమ్మెల్సీ కూర రఘోత్తంరెడ్డి, మాజీ ఎమ్మెల్సీ పూల రవీందర్ కలిసి మంత్రులకు వినతిపత్రం అందజేశారు.
వేర్వేరు జిల్లాల్లో పనిచేస్తున్న భార్యాభర్తలను ఒకే జిల్లాకు కేటాయించాలని, స్థానికత ఆధారంగా ఉపాధ్యాయులను సొంత జిల్లాకు బదిలీ చేయాలని, సీనియారిటీకి రక్షణ కల్పిస్తూ పరస్పర బదిలీలను అమలు చేయాలని విజ్ఞప్తిచేశారు. క్యాడర్ స్ట్రెంత్ సరిచేయాలని, మెడికల్, వితంతు ప్రాధాన్యతలను గుర్తించాలని కోరారు. అవసరమైతే సూపర్ న్యూమరీ పోస్టులను మంజూరు చేయాలని పేర్కొన్నారు. ఈ అంశాలను ప్రతిపాదనల రూపంలో ప్రభుత్వానికి సమర్పించి, ఉత్తర్వులు విడుదల చేస్తామని మంత్రులు హామీ ఇచ్చినట్టు నేతలు తెలిపారు.