హైదరాబాద్, జనవరి 8 (నమస్తే తెలంగాణ): ఆటోడ్రైవర్లను రెచ్చగొట్టి ధర్నాలు చేయిస్తున్నారని, అసత్య ప్రచారాలు చేస్తే ఉరుకోబోమని రాష్ట్ర రవాణా, బీసీ సంక్షేమశాఖ మంత్రి పొన్నం ప్రభాకర్ హెచ్చరించారు. చట్టాలకు లోబడి వ్యవహరించకపోతే మాజీ మంత్రులు అని కూడా చూడబోమని అన్నారు. సచివాలయం మీడియా సెంటర్లో సోమవారం మంత్రి పొంగులేటితో కలిసి మీడియాతో మాట్లాడుతూ తమపై దుష్ప్రచారం చేస్తున్నారని, నైతిక విలువలకు తిలోదకాలు ఇస్తున్నారని ఆరోపించారు.
తెలంగాణ ఉద్యమంలో కాంగ్రెస్ పార్టీ అధికారంలో ఉన్నా రాష్ట్రం కోసం తాము రోడ్డెకి ఆందోళనలు చేశామని చెప్పారు. తాము ధర్నా చౌక్ను ఓపెన్ చేశామని, ప్రజాస్వామ్యబద్ధంగా నిరసనలు తెలుపుకోవాలని అన్నారు. తమ హామీలు కచ్చితంగా అమలు చేస్తామని, నెల పూర్తయింది అప్పుడే అంత తొందరెందుకు అంటూ ప్రశ్నించారు. గతంలో ఆటో వాళ్లకి ఇబ్బందులు లేవా? అని పొన్నం ప్రభాకర్ ప్రశ్నించారు. తమకు రాఖీ కట్టిన కరీంనగర్ సోదరిని వాట్సాప్ యూనివర్సిటీలో అవమానపర్చారని ఆయన ఆగ్రహం వ్యక్తంచేశారు.