Minister KTR | మహిళా జర్నలిసుల (Women Journalists) కోసం ప్రత్యేకంగా మెడికల్ క్యాంపులు (Medical Camp) ఏర్పాటు చేసి, ఆరోగ్య పరీక్షలు చేయనున్నట్లు మంత్రి కేటీఆర్ (Minister KTR) తెలిపారు. ప్రపంచ మహిళా దినోత్సవం సందర్భంగా పీపుల్స్ ప్లాజాలో మహిళా జర్నలిస్టుల సన్మాన కార్యక్రమం జరిగింది. కార్యక్రమంలో మంత్రులు సబితా ఇంద్రారెడ్డి, సత్యవతి రాథోడ్, జగదీశ్రెడ్డి, కేటీఆర్ హాజరయ్యారు. ఈ సందర్భంగా మంత్రి కేటీఆర్ మాట్లాడారు. ‘మహిళా జర్నలిస్టులందరికీ ప్రభుత్వం తరఫున సత్కారం, గుర్తింపు పొందుతున్నందుకు శుభాకాంక్షలు. జర్నలిస్టులు మంచి పని చేసినప్పుడు ఎవరూ పొగడరు. ఒక నెగెటివ్ వార్తను ప్రసారం చేస్తే అన్ని వైపుల నుంచి దాడి ఉంటుంది. మా మున్సిపల్ శాఖ బాధ్యత కూడా అంతే. రోజు హైదరాబాద్ను శుభ్రంగా ఉంచే.. మమ్మల్ని మెచ్చుకునే వారు ఎవరూ లేరు. రెండు రోజులు అక్కడో ఇక్కడో పైప్ పగిలిపోయి.. ఒక మోరి సాఫ్ చేయకపోతెనో.. ఏదైనా ఇబ్బంది వస్తే విపరీతమైన
దాడి ఉంటుంది.
‘లేడి ఫొటోగ్రాఫర్లు, జర్నలిస్టులను చూస్తుంటే అప్పుడప్పు బాధ అనిపిస్తుంటుంది. హృదయపూర్వకంగా మీ అందరికీ శుభాకాంక్షలు. రాష్ట్ర ప్రభుత్వం తరఫున కొత్త కార్యక్రమాన్ని ప్రారంభిస్తున్నాం. వీ హబ్ ఆధ్వర్యంలో మహిళా జర్నలిస్టుల కోసం ‘విమెన్ ఇన్ జర్నలిజం లీడర్షిప్ యాక్సిలరేటర్’ ప్రోగ్రామ్ను ప్రారంభించబోతున్నాం. ఎవరైనా ఔత్సాహికులు ఎవరైతే ముందుకు రావాలనుకుంటున్నారో.. మెరుగ్గా,
సమర్థవంతంగా, కొత్త కొత్త పోకడలు, కొత్త వినూత్న ఆలోచనలను అర్థవంతంగా నేర్చుకొని జాతీయ, అంతర్జాతీయ స్థాయిలో కూడా పేరుతెచ్చుకోవాలనుకునే వారి కోసం యాక్సిలరేటర్ ప్రోగ్రామ్ను ప్రారంభిస్తున్నాం. వీ హబ్ ఆధ్వర్యంలో రెండు రోజుల లీడర్షిప్ ప్రోగ్రామ్ను నిర్వహించనున్నది. ఐ అండ్ పీఆర్ కమిషన్ అరవింద్కుమార్కు ధన్యవాదాలు. గత సంవత్సరం కూడా చాలా చక్కగా కార్యక్రమాన్ని
నిర్వహించారు. అంతకు ముందు సంవత్సరం కార్యక్రమం నిర్వహించకోవాలనుకున్నా కొవిడ్తో జరుపలేకపోయాం’ అన్నారు.
‘జర్నలిస్టులందరికీ విజ్ఞప్తి. గవర్నమెంట్, ప్రజాప్రతినిధులు అందరూ కోరుకునేది ఏంటంటే.. మేం ఏదైనా తప్పు, పొరపాటు చేసినప్పుడు, ప్రజా వ్యతిరేక పనులు చేసిన సమయంలో చీల్చిచెండాడే హక్కు మీకు ఉంటుంది. మీడియా ఫోర్త్ ఎస్టేట్. అదే సమయంలో మనిషిని కుక్క కరిస్తే వార్త కాదు.. కుక్కను మనిషి కరిస్తే కూడా వార్త కాదు. కల్యాణలక్ష్మితో బాల్య వివాహాలు తగ్గాయని విద్యాశాఖ మంత్రి చెప్పారు. కేసీఆర్ కిట్ ద్వారా ఇనిస్టిట్యూషన్ డెలివరీలు 30శాతం నుంచి 62శాతానికి పెరిగాయి. ప్రభుత్వ ఆసుపత్రుల్లో ఇవాళ అద్భుతాలు జరుగుతున్నయ్. కిడ్నీ ట్రాన్స్ప్లాంట్లో నిమ్స్ జాతీయ రికార్డును నెలకొల్పింది. మాతాశిశు మరణాల సంఖ్య కూడా తగ్గింది. ప్రభుత్వం తప్పు చేసినప్పుడు ఎలాగైతే వార్తలను హైలెట్ చేస్తున్నారో.. అదే పద్ధతుల్లో పాజిటివ్ న్యూస్ను ప్రసారం చేస్తే సమాజానికి మేలు చేసివారమవుతాం’ అన్నారు.
‘మహిళలపై అఘాయిత్యాలు, దాడులు జరిగిన సమయంలో మనిషన్న వారెవరూ బాధపడకుండా ఉండరు. కానీ, ప్రభుత్వంలో ఉన్న వాళ్లకి ఆ సెన్సివిటీ లేదనుకోవద్దు. ఇలాంటి వాటిలో రాత్రికి రాత్రే మార్పులు రావు. మహిళలను గౌరవించాలి, సాటి అమ్మాయిని గౌరవించాలనే సంస్కృతిని చిన్ననాటి నుంచే మగ పిల్లలకు నేర్పించాలి. జెండర్ సెన్సివిటి కరిక్యులమ్లో ఉండాలని, దానికి ప్రయత్నాలు జరగాలని పేర్కొన్నారు. ఒక ప్రయత్నం జరిగితే.. తప్పకుండా ఫలితాలు వస్తాయి. ఇందుకు సామాజిక బాధ్యతగా జర్నలిస్టులు ప్రచారం చేయాలి. జెండర్ సెన్సివిటీ, మహిళలపై దాడులు దాడులను నివారించేందుకు చేయాల్సిన కార్యక్రమాలపై ఎంత అవగాహన కల్పిస్తే అంత మంచిది.
సీనియర్ జర్నలిస్టులు వీ హబ్లో భాగస్వాములు కావాలి. సీనియర్ మహిళా జర్నలిస్టులు తమ అనుభవాలు, ఆలోచనలు, ఎదుర్కొన్న ఇబ్బందులు, ఎదురైనా సవాళ్లను కొత్త తరం జర్నలిస్టులతో పని చేసేందుకు వీ హబ్తో పని చేయాలి. హైదరాబాద్లోనే కాకుండా రాష్ట్రవ్యాప్తంగా అక్రిడేటెడ్ జర్నలిస్టులకు మెడికల్ క్యాంపులను ఏర్పాటు చేసి, పరీక్షలు నిర్వహిస్తాం. రాష్ట్రంలో 19వేల జర్నలిస్టులకు అక్రిడిటేషన్ కార్డులు జర్నలిస్టులకు జారీ చేశాం. గుజరాత్లో కేవలం 3వేల కార్డులే జారీ చేశారు. మహిళా జర్నలిస్టులంతా ఏకమై మహిళా జర్నలిస్ట్ యూనియన్ను ఏర్పాటు చేసుకోవాలి. తద్వారా సమస్యలన్నీ పరిష్కరించుకోవచ్చు’ అని మంత్రి కేటీఆర్ పేర్కొన్నారు.