హైదరాబాద్, నవంబర్ 9 (నమస్తే తెలంగాణ): ఢిల్లీ పెద్దలు, పరాయి రాష్ట్ర గద్దల చేతిలో పావులుగా మారిన రాష్ట్ర కాంగ్రెస్, బీజేపీ నాయకులు ఎన్ని పొర్లుదండాలు పెట్టినా, మళ్లీ తెలంగాణదే ఘన విజయమని బీఆర్ఎస్ వరింగ్ ప్రెసిడెంట్, మంత్రి కేటీఆర్ ధీమా వ్యక్తం చేశారు. గురువారం ప్రగతి భవన్లో రాష్ట్ర స్పోర్ట్స్ అథారిటీ చైర్మన్ డాక్టర్ ఆంజనేయ గౌడ్ వ్యాసాల సంకలనం ‘దారి చూపిన దశాబ్ది’ పుస్తకాన్ని మంత్రి కేటీఆర్ ఆవిషరించారు.
ఈ సందర్భంగా కేటీఆర్ మాట్లాడుతూ.. పదేండ్ల రాష్ట్ర ప్రగతిపథం దేశ పాలనా చరిత్రలో నూతన అధ్యాయమని పేర్కొన్నారు. సాగు, సంక్షేమ, పారిశ్రామిక రంగాల్లో సీఎం కేసీఆర్ అమలుచేసిన విధానాలు అద్భుత ఫలితాలనిచ్చాయని చెప్పారు. తన వ్యాసాల ద్వారా తెలంగాణ రాష్ట్ర పురోగతిని వివరించడంతోపాటు, బీజేపీ, కాంగ్రెస్ల అమానవీయ రాజకీయ నైజాన్ని బహిర్గతం చేస్తున్న ఆంజనేయ గౌడ్ కృషి ప్రశంసనీయమని అభినందించారు. అనంతరం ఆంజనేయ గౌడ్ సారథ్యంలో పాలమూరు గాయకుడు రేలారే ప్రసాద్ రచించి, ఆలాపించిన ‘గుండెకత్తుకుందమా.. గులాబీ జెండా ను’ పాటను కేటీఆర్ ఆవిషరించారు. ఈ కార్యక్రమంలో ఎంఎల్సీ రవీందర్ రావు, మాజీ ఎమ్మెల్సీ కర్నె ప్రభాకర్ తదితరులు పాల్గొన్నారు.