ధర్మపురి, అక్టోబర్ 6 : సీఎం కేసీఆర్ ఆలోచన, కృషి ఫలితంగానే తెలంగాణలో దశాబ్దాల కరువుకు చరమగీతం పాడగలిగామని సంక్షేమ శాఖ మంత్రి కొప్పుల ఈశ్వర్(Minister Koppula) పేర్కొన్నారు. జగిత్యాల జిల్లా ధర్మపురి వద్ద గోదావరి ఆధారంగా అక్కపెల్లి చెరువు నింపేందుకు రూ.60.80 కోట్లతో ఎత్తిపోతల పథకం నిర్మాణానికి పెద్దపల్లి ఎంపీ వెంకటేశ్ నేతకానితో కలిసి శుక్రవారం శంకుస్థాపన చేశారు.
ఈ సందర్భంగా మంత్రి మాట్లాడుతూ.. ఒకప్పుడు భూగర్భ జలాలు అడుగంటి పోయేవని, తెలంగాణ రాష్ట్రం ఆవిర్భావం తర్వాత సీఎం కేసీఆర్ కృషి వల్ల కరువు నేలల్లో జలసిరులు కురుస్తున్నాయన్నారు.
ప్రధానంగా వ్యవసాయ రంగంపై దృష్టి పెట్టడం, నీటి సంరక్షణ కోసం చేసిన చర్యలు ఫలించడంతో గతంలో కంటే పరిస్థితులు మెరుగుపడ్డాయన్నారు.
మిషన్ కాకతీయతో చెరువులకు పూర్వ వైభవం తీసుకురావడం, ప్రాజెక్టులు నిర్మించుకోవడం.. వంటి చర్యలు భూగర్భ జలాలు పెరగడానికి కారణమయ్యాయన్నారు. పాలకుల్లో చిత్తశుద్ధి ఉంటే ఎలాంటి విపత్కర పరిస్థితులనైనా ప్రజలకు అనుకూలంగా మార్చవచ్చని మన సీఎం కేసీఆర్ నిరూపించారన్నారు. ఈ కార్యక్రమంలో కరీంనగర్ డీసీఎమ్మెస్ చైర్మన్ డాక్టర్ ఎల్లాల శ్రీకాంత్రెడ్డి, తదితరులు పాల్గొన్నారు.