నాంపల్లి: కులం, మతం పేరుతో మంటలు పెట్టే బీజేపీకి మునుగోడులో డిపాజిట్లు కూడా దక్కొద్దని మంత్రి జగదీశ్ రెడ్డి (Jagadish Reddy) అన్నారు. అభివృద్ధి వైపు ఉంటరో.. అభివృద్ధి నిరోధకుల వైపు ఉంటారో ప్రజలు నిర్ణయించుకోవాలన్నారు. మునుగోడు నియోజకవర్గంలోని నాంపల్లి మండలం ఎస్.లింగోటంలో టీఆర్ఎస్ అభ్యర్థి కూసుకుంట్ల ప్రభాకర్ రెడ్డితో కలిసి మంత్రి జగదీశ్ రెడ్డి ప్రచారం నిర్వహించారు. ఈ సందర్భంగా మాట్లాడుతూ.. సీఎం కేసీఆర్ను గెలిపించుకుంటే మునుగోడులో అభివృద్ధి జట్ స్పీడ్తో దూసుకెళ్తుందని చెప్పారు. కూసుకుంట్ల గెలుపుతో నియోజకవర్గ దశ తిరుగుతుందని, అందివచ్చిన అవకాశాన్ని చేజార్చుకోవద్దని ప్రజలకు విజ్ఞప్తి చేశారు.
కాంట్రాక్టుల కోసం రాజగోపాల్ రెడ్డి అమ్ముడుపోయాడని విమర్శించారు. కోమటిరెడ్డి మళ్లీ గెలిస్తే ఈ ప్రాంతానికి ఏం జరుగుతుందో చెప్పాలని డిమాండ్ చేశారు. టీఆర్ఎస్తో మునుగోడు అభివృద్ధి సాధ్యమని, పార్టీ అభ్యర్థి కూసుకుంట్లను భారీ మెజార్టీతో గెలిపించాలని పిలుపునిచ్చారు.