హైదరాబాద్, సెప్టెంబర్ 22 (నమస్తే తెలంగాణ): ఆర్థిక, వైద్యారోగ్యశాఖ మంత్రి హరీశ్రావు శుక్రవారం డీహెచ్, డీఎంఈ పరిధిలోని వైద్య సంఘాల ప్రతినిధులతో ప్రగతి భవన్లో చర్చలు జరిపారు. ప్రజారోగ్య విభాగానికి సంబంధించి.. పబ్లిక్ హెల్త్ డాక్టర్స్ అసోసియేషన్ (టీపీహెచ్డీఏ), ఐక్యవేదిక ప్రతినిధులు ఆరోగ్య సిబ్బందికి సంబంధించిన పలు విషయాలపై చర్చించారు. వీటిపై మంత్రి సానుకూలంగా స్పందించారని టీపీహెచ్డీఏ అధ్యక్షుడు కత్తి జనార్దన్ తెలిపారు. ప్రజారోగ్య విభాగంలో రీఆర్గనైజేషన్ జీవో 142 వల్ల వివిధ రకాల క్యాడర్లకు అభ్యంతరాలపై ఉన్నత స్థాయి కమిటీ వేయాలని కోరగా, మంత్రి వెంటనే ఉన్నతాధికారులను ఆదేశించారని చెప్పారు. జీవో 155లో మార్పులకు అంగీకారం తెలిపారని పేర్కొన్నారు. డీఎంఈ తరహాలో డీహెచ్ పరిధిలోని డాక్టర్లకు కెరీర్ అడ్వాన్స్మెంట్ స్కీం, విదేశాల్లో చదువుకున్న తెలంగాణ బిడ్డలు ఇక్కడ లోకల్ అభ్యర్థులుగా పరిగణించడం, పల్లె దవాఖానల వైద్యుల వేతనం పెంపు తదితర అంశాలపై మంత్రి సానుకూలంగా స్పందించారని తెలిపారు. ఈ సందర్భంగా వారు మంత్రి హరీశ్రావుకు ధన్యవాదాలు తెలిపారు.
టీటీజీడీఏ ప్రతినిధులతో..
డీఎంఈ విభాగంలోని వైద్యుల సమస్యలపై మంత్రి హరీశ్రావు తెలంగాణ టీచింగ్ గవర్నమెంట్ డాక్టర్స్ అసోసియేషన్ (టీటీజీడీఏ) ప్రతినిధులతో చర్చలు జరిపారు. ఈ సందర్భంగా ప్రస్తావించిన అంశాలను ఒక్కొక్కటిగా నెరవేరుస్తామని మంత్రి హామీ ఇచ్చినట్టు సంఘం అధ్యక్షుడు అన్వర్ తెలిపారు. ప్రొఫెసర్ల బదిలీలు, పీఆర్సీ బకాయిలను త్వరలోనే మంజూరు చేస్తామన్నారని చెప్పారు. ఈ సందర్భంగా మంత్రికి టీటీజీడీఏ కార్యదర్శి జలగం తిరుపతిరావు, ఉపాధ్యక్షుడు కిరణ్ మాదాల, కోశాధికారి కిరణ్ ప్రకాశ్ ధన్యవాదాలు తెలిపారు.