నల్లగొండ : మునుగోడు ఉప ఎన్నికలో కారు గుర్తుకు ఓటేసి కూసుకుంట్ల ప్రభాకర్ రెడ్డిని భారీ మెజార్టీతో గెలిపించాలని ఆ నియోజకవర్గ ఓటర్లకు మంత్రి హరీశ్రావు పిలుపునిచ్చారు. సిలిండర్ ధర పెంచిన మోదీ మీద కసితో కారు గుర్తుకు ఓటేయాలని సూచించారు. చండూరులో నిర్వహించిన రోడ్ షోలో హరీశ్రావు పాల్గొని ప్రసంగించారు.
ఎల్లుండి పొద్దున్నే ఓటు వేసేందుకు వెళ్లే ముందు అక్కాచెల్లెళ్లు వంటింట్లోకి వెళ్లి సిలిండర్కు దండం పెట్టుకోండి. అక్కాచెల్లెళ్లు అప్పుడప్పుడు మరిచిపోతరు. మా సోదరిమణులకు కొంచెం ప్రేమ ఎక్కువ, దయ ఎక్కువ. మళ్లీ టీవీల్లో ఎవడైనా ఏడ్సినట్టు చేస్తే.. అయ్యో పాపం అంటారు. అందుకే పోలింగ్ సెంటర్కు వెళ్లే ముందు ఆ వంటింట్లోకి వెళ్లి సిలిండర్కు దండం పెడితే.. ఆ మోదీ పెంచిన రూ. 1200 యాదికి వస్తది. ఆ కసి కసి మీద కారు గుర్తు మీద గుద్దుడే గుద్దాలి. గుద్దితే ఢిల్లీలో బీజేపీ నేతలకు దిమ్మ తిరగాలి. అట్లయితనే సిలిండర్ ధర తగ్గుతది. ఇప్పుడు కూడా మోదీకి ఓటేస్తే.. రేపు సిలిండర్ ధర రూ. 1500 అయితది. ఆ విషయాన్ని కూడా గుర్తుంచుకోవాలి. బోరు బావి వద్ద మీటర్ కూడా వస్తది. పెట్రోల్ రేటు రూ. 150 అయితది. అందుకే జాగ్రత్త ఓటేయండి.
మనం ఆగం కావొద్దు. ఇవాళ ఈ ప్రభుత్వం 14 నెలలు ఉంటది. మీకిచ్చిన ప్రతి మాట నెరవేర్చుకుంటాం. మళ్లీ ఓట్లకు రావాలి కదా? అందుకే ఇచ్చిన ప్రతి హామీని నెరవేర్చుతాం. కారుకు ఓటేసి బాధ్యత మా మీద ఉంచండి. బరువు పెట్టండి.. మా చేత పని చేయించండి. మహిళలకు వడ్డీ లేని రుణం డబ్బులను కూడా ఇస్తాం. ఎవరూ ఆందోళనకు గురి కావొద్దు. టీఆర్ఎస్ గెలవొద్దనే ఉద్దేశంతో అనేక కుట్రలు చేస్తున్నారు. పని చేసే ముఖం అయితే, ప్రజాస్వామ్యం మీద నమ్మకం ఉంటే ప్రజలను నమ్ముకోవాలి. మేం పని చేశాం. భవిష్యత్లో ఇవి చేయబోతున్నాం అని చెప్పి ఓట్లు అడుగుతున్నాం. దొంగ పనులతో మనం బతకలేం అని హరీశ్రావు పేర్కొన్నారు.