పాలకుర్తి: జాతీయ సేవా పథకం (NSS) విభాగంలో తెలంగాణ రాష్ట్రం నుంచి పాలకుర్తి మండలం గూడూరు వాసి గుండె పరశురాములు జాతీయ అవార్డు స్వీకరించారు. రాష్ట్రపతి చేతుల మీదుగా అతను జాతీయ అవార్డు అందుకున్నారు. ఈ సందర్భంగా పరశురాములును రాష్ట్ర పంచాయతీరాజ్, గ్రామీణాభివృద్ధి, గ్రామీణ మంచినీటి సరఫరా శాఖల మంత్రి ఎర్రబెల్లి దయాకర్ రావు అభినందించారు.
నేషనల్ సర్వీస్ స్కీమ్ విభాగంలో తెలంగాణ నుంచి జాతీయ స్థాయికి ఎంపికైన పరశురాములును మంత్రి ఎర్రబెల్లి హనుమకొండలోని తన క్యాంపు కార్యాలయానికి పిలిపించుకుని అభినందించారు. చిన్న వయసు, అందునా చదువుకునే రోజుల నుంచే సేవా భావం పెంపొందడం గొప్ప విషయమని మంత్రి కొనియాడారు. ఈ సందర్భంగా ఈ నెల 29 న రాష్ట్రపతి భవన్ లో రాష్ట్రపతి ద్రౌపతి ముర్ము చేతుల మీదుగా అందుకొన్న అవార్డును, సర్టిఫికెట్ను పరశురాములు మంత్రికి చూపించారు. పరశురాములు ప్రస్తుతం MBA చదువుతున్నాడు.