హైదరాబాద్(నమస్తే తెలంగాణ): నిధులు ఇచ్చినా ఇవ్వకపోయినా ప్రధాని మోదీ పెద్దన్నలాంటివారని శాసనసభ వ్యవహారాల మంత్రి శ్రీధర్బాబు కొనియాడారు. పీఎంను కలిసినంత మాత్రాన బీజేపీకి దగ్గరైనట్టుకాదని ఉద్ఘాటించారు.
సోమవారం సీఎల్పీలో ఆయన మాట్లాడుతూ… రాష్ట్ర ప్రయోజనాల కోసం ప్రధాని మోదీని కలవడం తమ కనీస బాధ్యతని పేర్కొన్నారు. తెలంగాణకు ఎకువ నిధులు ఇవ్వాలని కేంద్రాన్ని కోరినా బడ్జెట్లో తెలంగాణకు అన్యాయం చేసిందని మండిపడ్డారు. తెలంగాణకు జరిగిన అన్యాయంపై కేంద్రంపై పోరాటం చేస్తామని ప్రకటించారు. అసెంబ్లీలో బడ్జెట్పై చర్చను పలు కారణాలతో మూడు రోజుల్లోనే పూర్తి చేయాల్సి వస్తుందని తెలిపారు.
కేంద్ర బడ్జెట్లో తెలంగాణను పూర్తిగా విస్మరించారని నీటి పారుదల శాఖ మంత్రి ఉత్తమ్కుమార్రెడ్డి మండిపడ్డారు. బడ్జెట్ రాజకీయ ప్రేరేపితమైందని, ప్రజల కోసం కాదని, బీజేపీ మిత్రపక్షాలు, జేడీయూ, టీడీపీలను ప్రసన్నం చేసుకునేందుకే రూపొందించారని అభివర్ణించారు. కేంద్ర మంత్రులు జి కిషన్ రెడ్డి, బండి సంజయ్ సహా 8మంది బీజేపీ ఎంపీలు కేంద్ర బడ్జెట్లో తెలంగాణకు తగిన వాటాను తీసుకురావడంలో విఫలమయ్యారని విమర్శించారు.