హైదరాబాద్, జూన్ 19 (నమస్తే తెలంగాణ): రాష్ట్రంలోని ప్రైవేట్ మెడికల్ కాలేజీల్లో వైద్యవిద్యకు అదనపు ఫీజులు వసూలు చేయవద్దని వైద్యారోగ్యశాఖ మంత్రి దామోదర రాజనర్సింహ స్పష్టం చేశారు. బయోమెట్రిక్ అటెండెన్స్ విధానంలో అవకతవకలకు పాల్పడితే కఠిన చర్యలు తీసుకుంటామని హెచ్చరించారు. బుధవారం ఆయన సచివాలయంలో ప్రైవేటు మెడికల్, డెంటల్ కాలేజీల యజమానులు, డీన్లతో సమావేశమయ్యారు.
రాష్ట్రం నుంచి నాణ్యమైన వైద్యులను తయారుచేయడమే తమ లక్ష్యమని చెప్పారు. పారదర్శకంగా, నిరంతర పర్యవేక్షణలో వైద్య విద్యాబోధన జరగాలని సూచించారు. ఈ సందర్భంగా యజమానులు, డీన్లు, ప్రిన్సిపాళ్లు చేసిన విజ్ఞప్తులపై మంత్రి సానుకూలంగా స్పందించారు. సమావేశంలో డీఎంఈ వాణి, ప్రత్యేక అధికారి విమల థామస్ తదితరులు పాల్గొన్నారు.