హైదరాబాద్, జూన్ 6 (నమస్తే తెలంగాణ): మోదీకి బదులు మరొకరు ప్రధాని అయ్యే అవకాశం ఉంటే వారికి మద్దతిస్తానని ఎంఐఎం అధినేత, హైదరాబాద్ ఎంపీ అసదుద్దీన్ ఒవైసీ చెప్పారు. గురువారం ఏఎన్ఐతో మాట్లాడుతూ.. 2024 లోక్సభ ఎన్నికల్లో బీజేపీకి ఇన్ని సీట్లు వచ్చి ఉండాల్సింది కాదన్నారు. ‘దేశంలో ఉన్న వాతావరణం ప్రకారం బీజేపీకి ఇన్ని సీట్లు కూడా రాకూడదు.
మేం సరిగ్గా పనిచేసి ఉంటే వారికి కేవలం 150 సీట్లు మాత్రమే వచ్చేవి. బీజేపీ ప్రభుత్వాన్ని ఏర్పాటు చేయకుండా ఆపగలిగే వాళ్లం. ప్రజలు కూడా అదే కోరుకున్నారు. కానీ విజయవంతం కాలేదు’ అని అన్నారు. ఒక విషయం స్పష్టంగా ఉందని, దేశంలో ఏ ముస్లిం ఓటు బ్యాంకు లేదని, ఎప్పటికీ ఉండదని చెప్పారు.