హైదరాబాద్, ఏప్రిల్ 8 (నమస్తే తెలంగాణ): తెలంగాణ ప్రజలకు మరో తీపి కబురు అందింది. సీఎం కేసీఆర్ ఆదేశాల మేరకు జిల్లాకో మెడికల్ కాలేజీ ఏర్పాటు దిశగా మరో కీలక ముందడుగు పడింది. కామారెడ్డి, కుమ్రంభీం ఆసిఫాబాద్లో ప్రభుత్వం ఏర్పాటు చేస్తున్న మెడికల్ కాలేజీలకు నేషనల్ మెడికల్ కమిషన్ (ఎన్ఎంసీ) అనుమతి ఇచ్చింది. దీంతో ఒక్కో కాలేజీలో వంద ఎంబీబీఎస్ సీట్లు అందుబాటులోకి రానున్నాయి. రెండు మెడికల్ కాలేజీలు మంజూరు కావడం పట్ల వైద్యారోగ్య శాఖ మంత్రి హరీశ్రావు హర్షం వ్యక్తం చేశారు.
సీఎం కేసీఆర్ సారథ్యంలో ఆరోగ్య తెలంగాణ సాధన దిశగా మరో కీలక అడుగు పడిందని శనివారం ట్వీట్ చేశారు. రాష్ట్రప్రభుత్వం ఈ ఏడాది మొత్తం 9 జిల్లాల్లో మెడికల్ కాలేజీలు ఏర్పాటు చేయాలని లక్ష్యంగా పెట్టుకున్నది. ఈ విద్యాసంవత్సరంలోనే తరగతులు ప్రారంభించేలా చర్యలు చేపట్టాలని ప్రభుత్వం సంకల్పించింది. ఇటీవల ఎన్ఎంసీకి చెందిన మెడికల్ అసెస్మెంట్ అండ్ రేటింగ్ బోర్డు (ఎంఏఆర్బీ) బృందం రాష్ట్రంలో పర్యటించింది. కాలేజీల ఏర్పాటు పనులు, వసతులను పరిశీలించింది. కామారెడ్డి, ఆసిఫాబాద్లోని కాలేజీలు నిబంధనలకు అనుగుణంగా ఉండటంతో తాజాగా అనుమతులు మంజూరు చేసింది. మిగతా ఏడు కాలేజీల అనుమతులు వివిధ దశల్లో ఉన్నాయి.
మారుమూల ప్రాంతాలకు కాలేజీ
ఆసిఫాబాద్ అంటేనే గిరిజన జిల్లా. వైద్య సదుపాయాలు పెద్దగా అందుబాటులో లేని ఏజెన్సీ ప్రాంతం. మంచి వైద్యం పొందాలంటే తక్కువలో తక్కువ వంద కిలోమీటర్లు ప్రయాణించి ఆదిలాబాద్కు వెళ్లాల్సిందే. రాష్ట్రప్రభుత్వం ఇప్పటికే ఆ జిల్లాలో వైద్యసదుపాయాలను అభివృద్ది చేసింది. జిల్లాకు ఒక మెడికల్ కాలేజీ ఏర్పాటు చేయాలన్న సీఎం కేసీఆర్ ఆలోచన మేరకు ఆసిఫాబాద్కు కూడా వస్తుందని ప్రకటించినప్పుడు చాలా మంది నమ్మలేదు. బడ్జెట్ సందర్భంగా సీఎం కేసీఆర్ ప్రకటన మేరకు అనుబంధంగా నర్సింగ్ కాలేజీ సైతం ఏర్పాటవుతున్నది.
గ్రామీణ వైద్యం మరింత బలోపేతం
ఆరోగ్యతెలంగాణలో భాగంగా గ్రామీణ ప్రాంతాల్లో వైద్య వసతులు మరింత మెరుగవుతున్నాయి. కామారెడ్డి, కుమ్రం భీం ఆసిఫాబాద్ జిల్లాల్లో మెడికల్కాలేజీల ఏర్పాటుకు ఎన్ఎంసీ అనుమతి ఇచ్చింది. జిల్లాకు ఒక మెడికల్ కాలేజీ చేయాలన్న సీఎం కేసీఆర్ విజన్లో ఇది మరో కీలక ముందడుగు. మరో ఏడు కాలేజీల అనుమతులు వివిధ దశల్లో ఉన్నాయి.
– ఆర్థిక, వైద్యారోగ్య శాఖ మంత్రి హరీశ్రావు