ఉస్మానియా యూనివర్సిటీ: దేశంలో నీట్ 2024 పేరుతో భారీ అవినీతికి పాల్పడ్డారని బీఆర్ఎస్వీ ఓయూ నాయకుడు నాగేందర్ కోదాటి ఆరోపించారు. కేంద్రప్రభుత్వం, ఎన్టీఏలు విద్యార్థుల జీవితాలతో చెలగాటమాడుతున్నాయని మండిపడ్డారు. ఇటీవల విడుదలైన నీట్ ఫలితాల్లో 720 మార్కులకు గాను 67 మందికి 720 మార్కులు వచ్చాయని గుర్తు చేశారు. ఇది సాధ్యంకానిదని మేధావులు, వైద్యులు ఘంటాపథంగా చెబుతున్నారన్నారు. ఒకే పరీక్షా కేంద్రంలో పరీక్ష రాసిన ఆరుగురికి 720 మార్కులు రావడం ఎలా సాధ్యమని ప్రశ్నించారు. 180 ప్రశ్నలకు ఒక్కో ప్రశ్నకు నాలుగు మార్కుల చొప్పున మొత్తం 720 మార్కులకు పరీక్ష నిర్వహించగా, 719, 718 మార్కులు ఎలా వస్తాయని ప్రశ్నించారు. విద్యార్థులు ఎంతో కష్టపడి పెద్ద పెద్ద నగరాల్లో లక్షలు ఖర్చు చేసి కోచింగ్ తీసుకున్నప్పటికీ, ఎన్టీఏ అవినీతితో అదంతా వృథా అవుతున్నదని ఆవేదన వ్యక్తం చేశారు. ఈ అవినీతి వెనుక పెద్దపెద్ద రాజకీయ నాయకులు, వ్యాపారవేత్తలు ఉన్నారని అనుమానం వ్యక్తం చేశారు. ఎన్టీఏ డైరెక్టర్ను తక్షణమే అరెస్టు చేసి, సీబీఐకి కేసు అప్పగించాలని డిమాండ్ చేశారు. పరీక్షను తిరిగి నిర్వహించాలని, అప్పుడే విద్యార్థులకు న్యాయం జరుగుతుందన్నారు.