కొత్తగూడెం క్రైం, జూలై 10: సాధారణ జీవితం గడుపుతున్న ఓ వృద్ధుడిని సీఎం రేవంత్రెడ్డి ఆదేశాల మేరకు పోలీసులు కిడ్నాప్ చేసి, ఆపై అరెస్ట్గా చిత్రీకరించి కట్టు కథలు అల్లుతున్నారని మావోయిస్టు పార్టీ తెలంగాణ రాష్ట్ర కమిటీ పేరుతో బుధవారం విడుదలైన లేఖ సంచలనం సృష్టిస్తున్నది. మావోయిస్టు పార్టీలో సుదీర్ఘకాలంగా పనిచేసి, అరెస్టు అయిన తర్వాత పదేండ్ల క్రితం జైలు నుంచి విడుదలైన మహ్మద్ హుస్సేన్ను పోలీసులు అక్రమంగా అరెస్ట్ చేశారంటూ ఆ పార్టీ ఆరోపించింది.
రెండు నెలల నుంచి సికాస పునర్నిర్మాణం కోసం మందమర్రి, రామకృష్ణాపూర్ ఏరియాలో మావోయిస్టు భావజాలాన్ని తీసుకెళ్తున్నారని, కరపత్రాలు పంచుతున్నారనే నెపంతో ఈ అక్రమ అరెస్టు జరిగిందని లేఖలో పేర్కొన్నారు. రామగుండం పోలీస్ కమిషనర్ సూచనలతో మందమర్రి సీఐ, ఎస్సై పెట్రోలింగ్ నిర్వహిస్తుండగా ఆర్కె-1 మైన్ రోడ్డులో వారిని చూసి పారిపోతున్న వ్యక్తిని అదుపులోకి తీసుకున్నామని, అతడి నుంచి నల్లటి బ్యాగులో డాక్యుమెంట్లు, కరపత్రాలు, వాల్పోస్టర్లు దొరకడంతో అతడిని అరెస్టు చేసినట్టు కట్టు కథ అల్లారని లేఖలో ఉంది.
పదేండ్లుగా జమ్మికుంటలో సాధారణ జీవితం గడుపుతున్న 73 ఏండ్ల హుస్సేన్.. పారిపోతుండగా పట్టుకున్నట్టు సృష్టించిన కట్టు కథ ప్రజలు నమ్మదగినదిగా లేదని విమర్శించారు. జనవరిలో స్విట్జర్లాండ్లోని దావోస్లో జరిగిన ప్రపంచ ఆర్థిక సదస్సుకు వెళ్లిన సీఎం రేవంత్రెడ్డి.. దేశ, విదేశ కార్పొరేట్లతో ఎన్నడూ లేని విధంగా రూ.37,870 కోట్ల పెట్టుబడులకు ఒప్పందం చేసుకున్నారని తెలిపారు.
ఇందులో ఒక అదాని గ్రూపు వాటానే రూ.12,400 కోట్ల పెట్టుబడి అని, విద్యుత్తు, డేటా సెంటర్, ఏరోస్పేస్, డిఫెన్స్, సిమెంట్, గ్రీన్ ఎనర్జీ తదితర రంగాల్లో అదాని గ్రూప్ పెట్టుబడులు పెడుతుందని, అందులో భాగంగానే దక్షిణ తెలంగాణ విద్యుత్తు సంస్థ (టీజీఎస్పీడీఎల్) పలు సర్కిళ్లను ప్రైవేటు సంస్థలకు అప్పగించే ఒప్పందం కుదుర్చుకున్నదని ఆరోపించారు.
ఇప్పటికే హైదరాబాద్ పాత బస్తీలో విద్యుత్తు బకాయిల వసూళ్లను, విద్యుత్తు భూగర్భ లైన్లు వేసే కాంట్రాక్టును అదానికి అప్పగించారని తెలిపారు. కేంద్ర, రాష్ట్ర ప్రభుత్వాలు అంతర్గత ఒప్పందం చేసుకుని సింగరేణి బొగ్గు బ్లాక్ల అమ్మకానికి సిద్ధమయ్యాయని వివరించారు. దీంతో కార్మికులు సింగరేణి బ్లాక్ల ప్రైవేటీకరణకు వ్యతిరేకంగా చేపట్టిన ఉద్యమాలను అణిచివేయడానికి కుట్రలు చేస్తున్నాయని, నాయకత్వం వహిస్తున్న వారిపై మావోయిస్టు ముద్ర వేసి అరెస్టులు చేస్తున్నాయని ఆరోపించారు.
డీఎస్సీ పరీక్షలకు ప్రిపేర్ అవ్వడానికి ఒక నెల గడువు ఇవ్వాలని ప్రభుత్వాన్ని కోరిన విద్యార్థులను అరెస్టు చేసి కేసులు పెడుతున్నారని విమర్శించారు. దండకారణ్యంలో ఆపరేషన్ కగార్ పేరుతో జరుపుతున్న మారణహోమాన్ని చూసి చలించిపోయి, ఈ నరమేథాన్ని ఆపాలంటూ ‘జల్, జంగిల్, జమీన్ మాది’ అనే నాటకంతో స్పూర్తిని నింపుతున్న నేపథ్యంలో చిన్నపిల్లలను, వారి తల్లిదండ్రులను బెదిరింపులకు గురిచేస్తున్నారని చెప్పారు. కొద్ది మంది దోపిడీ వర్గాల ప్రయోజనాల కోసం పౌర సమాజంపై, ప్రజల ప్రజాస్వామిక హక్కులపై జరుగుతున్న పాశవిక దాడులను, అక్రమ అరెస్టులను బుద్ధిజీవులు, ప్రజాస్వామికవాదులు, పౌరహక్కుల సంఘాలు, ప్రజాహితం కోరుతున్న వారు ఖండించాలంటూ లేఖలో పేర్కొన్నారు.