హైదరాబాద్, జూలై 8 (నమస్తే తెలంగాణ): ఉస్మానియా, గాంధీ దవాఖానల్లో వివిధ సేవలను కార్పొరేట్ సోషల్ రెస్పాన్సిబిలిటీ (సీఎస్ఆర్) కింద నిర్వహించాలని ఫార్మా కంపెనీలను వైద్యారోగ్య శాఖ మంత్రి దామోదర రాజనర్సింహ కోరారు. సచివాలయంలో సోమవారం ఆయన 12 ప్రముఖ ఫార్మా కంపెనీల సీఎస్ఆర్ విభాగాధిపతులతో సమావేశమయ్యా రు. ఈ సందర్భంగా మాట్లాడుతూ.. ఉస్మానియా, గాంధీ దవాఖానల పూర్వవైభవానికి అవసరమైన మౌలిక సదుపాయాల కల్పనకు, మెరుగైన సేవలు అందించేందుకు సీఎస్ఆర్ నిధులు కేటాయించాలని కోరారు.
ప్రాధాన్య రంగాలైన పేషంట్ కేర్, శానిటేషన్, డైట్, బయో – మెడికల్ వేస్టేజ్, శుద్ధిచేసిన తాగునీటి సరఫరా వంటి అంశాల్లో సీఎస్ఆర్ నిధులు అందించాలని కోరారు. రోగులకు మెరుగైన వైద్య సేవలను అందించటానికి అవసరమైన సిబ్బంది, విద్య, వైద్య రంగాలతోపాటు బాలికల చదువు వంటి అంశాల్లోనూ సహాయం చేయాలని అన్నారు. ఈ వారంలోనే ఉస్మానియా, గాంధీ దవాఖానలను క్షేత్రస్థాయిలో పరిశీలిస్తామని సంస్థ ప్రతినిధులు హామీ ఇచ్చారు. దీంతో అవసరమైన ప్రతిపాదనలను తక్షణమే సమర్పించాలని ఉస్మానియా, గాంధీ దవాఖానల సూపరింటెండెంట్లను మంత్రి ఆదేశించారు. కార్యక్రమంలో డీఎంఈ వాణి, ఉస్మానియా, గాంధీ దవాఖానల సూపరింటెండెంట్లు డాక్టర్ నాగేందర్, డాక్టర్ రాజారావు తదితరులు పాల్గొన్నారు.
బదిలీలు పారదర్శకంగా సాగాలి
వైద్య, ఆరోగ్య శాఖలోని ఉద్యోగుల బదిలీలు పారదర్శకంగా సాగాలని మంత్రి దామోదర రాజనర్సింహ ఆదేశించారు. సోమవారం ఆయన బదిలీలపై వైద్యారోగ్య శాఖలోని విభాగాధిపతులతో సుదీర్ఘంగా చర్చించారు. జీవో నంబర్ 80లో పేరొన్న నిబంధనలను తు.చ. తప్పకుండా పాటించాలని ఆదేశించారు.