హైదరాబాద్, జూన్ 17 (నమస్తే తెలంగాణ): రాష్ట్రవ్యాప్తంగా మహాలక్ష్మి పథకం కింద ఇప్పటివరకు సుమారు 40 కోట్ల మంది మహిళలు ఉచితంగా బస్సుల్లో ప్రయాణించినట్టు టీజీఎస్ ఆర్టీసీ అధికారులు అంచనా వేశారు. సుమారు 1,800 కోట్ల రూపాయలను మహిళలు ఆదా చేసుకున్నట్టు తెలిపారు. ప్రయాణాల్లో మహిళల సంఖ్య పెరగడం, మహిళలు ఏ డోర్ నుంచి బస్సు ఎక్కుతున్నారో తెలియకపోవడం వల్ల తరచూ ప్రమాదాలు చోటుచేసుకుంటున్నాయి.
ఈ నేపథ్యంలో ప్రమాదాల నివారణకు బస్సుల డోర్ల వద్ద కొత్తగా స్టిక్కర్లను అతికిస్తున్నారు. స్త్రీలు ముందు వైపు, పురుషులు వెనుక వైపు నుంచి బస్సు ఎకాలని సూచిస్తూ స్టికర్లు ఏర్పాటుచేస్తున్నట్టు అధికారులు తెలిపారు. ముందు ద్వారం వద్ద మహిళల ఫొటో, వెనక ద్వారాల వద్ద పురుషుల ఫొటోతో పెయింట్ వేశారు. ఎవరికి కేటాయించిన ద్వారం నుంచి వాళ్లే ఎకాలని కండక్టర్లు సైతం ప్రయాణికులకు చెప్తున్నారు.