CM Revanth Reddy | హైదరాబాద్, జూలై 25 (నమస్తే తెలంగాణ): సీఎం రేవంత్రెడ్డి అదృష్ట సంఖ్య ‘9’ని బడ్జెట్ పద్దులో కూడా వదిలిపెట్టలేదా? అంటే అవుననే అంటున్నాయి సోషల్ మీడియా వర్గాలు. రూ.2,91,159 కోట్లతో ప్రభుత్వం బడ్జెట్ను ప్రవేశపెట్టింది. ఈ అంకెలన్నీ కలిపితే చివరికి 9 సంఖ్య వస్తున్నదంటూ విశ్లేషిస్తున్నారు. సీఎం రేవంత్రెడ్డి అధికారంలోకి వచ్చినప్పటి నుంచీ 9 నంబర్ వచ్చేలా జాగ్రత్త పడుతున్న సంగతి తెలిసిందే.
తన కాన్వాయ్లో వాహనాలన్నింటికీ 9 సంఖ్యనే వాడుతున్నారు. సచివాలయంలోని తన కార్యాలయాన్ని ఆరో అంతస్తు నుంచి 9వ అంతస్తుకు మార్చేందుకు ప్రయత్నించారన్న విమర్శలు ఉన్నాయి. ఇదే తరహాలో ఇప్పుడు బడ్జెట్ పద్దును కూడా అంకెలను కూడితే 9 వచ్చేలా జాగ్రత్త పడ్డారంటూ సోషల్ మీడియాలో సెటైర్లు పడుతున్నాయి. గతంలో సీఎం కేసీఆర్ 6 నంబర్ను అదృష్ట సంఖ్యగా భావిస్తే మూఢనమ్మకాలంటూ విమర్శించిన కాంగ్రెస్.. ఇప్పుడు ఎలా సమర్థించుకుంటుందంటూ ప్రశ్నిస్తున్నారు.