హైదరాబాద్, ఫిబ్రవరి 19 (నమస్తే తెలంగాణ): అక్రమంగా మానవ ప్లాస్మాను విక్రయిస్తున్న రెండు బ్లడ్ బ్యాంకుల లైసెన్సులను రద్దు చేసినట్టు డ్రగ్స్ కంట్రోల్ అడ్మినిస్ట్రేషన్ (డీసీఏ) సోమవారం తెలిపింది. హైదరాబాద్ మియాపూర్ మదీనాగూడలోని శ్రీకర హాస్పిటల్ బ్లడ్ సెంటర్, దారుల్షిఫాలోని న్యూ లైఫ్ ఎడ్యుకేషనల్ సొసైటీ బ్లడ్ సెంటర్ లైసెన్సులను రద్దు చేసినట్టు డీసీఏ డీజీ కమలాసన్ రెడ్డి తెలిపారు.
డీసీఏ అధికారులు ఈ నెల 2న మూసాపేటలోని హీమో సర్వీస్ ల్యాబ్స్పై అధికారులు దాడులు చేశారని, ఈ సందర్భంగా భారీ ఎత్తున మానవ ప్లాస్మా నిల్వలను గుర్తించినట్టు వివరించారు. దీనిని నిర్వహిస్తున్న రాఘవేంద్రనాయక్ను విచారించగా.. శ్రీకర బ్లడ్ బ్యాంక్, దారుల్షిఫాలోని అబీద్ అలీఖాన్ లయన్స్ ఐ హాస్పిటల్లో నడుస్తున్న న్యూలైఫ్ ఎడ్యుకేషనల్ సొసైటీ నుంచి అక్రమంగా ప్లాస్మాను సేకరించినట్టు తెలిపారు. దీంతో రెండు బ్లడ్ బ్యాంకులపై దాడులు చేయగా, ఇది నిజమేనని తేలిందని పేర్కొన్నారు. ఈ నేపథ్యంలో రెండు బ్లడ్ బ్యాంకుల లైసెన్సులు రద్దు చేసినట్టు వెల్లడించారు.