KTR | హైదరాబాద్, జూలై 19 (నమస్తే తెలంగాణ): కాంగ్రెస్ ప్రభుత్వం చేసిన రుణ మాఫీ ‘చారాణ కోడికి బారాణ మసాలా’ చందంగా ఉన్నదని బీఆర్ఎస్ వర్కింగ్ ప్రెసిడెంట్ కే తారకరామారావు వ్యాఖ్యానించారు. రైతు రుణ మాఫీపై శుక్రవారం ఎక్స్ వేదికగా కేటీఆర్ స్పందించారు. ఊరించి, ఊరించి, ఏడు నెలలు ఏమార్చి చేసిన రుణమాఫీ తీరు చూస్తే.. తెలంగాణ ప్రజలకు గుర్తొచ్చిన సామెత ‘చారాణ కోడికి.. బారాణ మసాల’ అని పేర్కొన్నారు. రుణమాఫీ అయిన రైతులకన్నా, కంటతడి పెట్టిన కుటుంబాలే ఎకువ అని తెలిపారు. ప్రభుత్వం రూపొందించిన మార్గదర్శకాలు.. రైతుమాఫీ పథకానికి మరణ శాసనాలయ్యాయని విమర్శించారు. కొంతమంది రైతులకు అన్నివిధాలా అర్హత ఉన్నా.. వారికి రుణమాఫీ ఎందుకు కాలేదో చెప్పెటోడు లేడని ఆరోపించారు. రైతులు గోడు చెప్పుకుందామంటే వినేటోడు లేడని మండిపడ్డారు.
అర్హులైన లబ్ధిదారులు రుణమాఫీ కాక, అంతులేని ఆందోళనలో ఉంటే మరోవైపు ప్రభుత్వం సంబురాలు జరుపుకోవడం ఎందుకని ప్రశ్నించారు. ‘40 లక్షల మంది అర్హులైన రైతుల్లో మెజారిటీ రైతులకు నిరాశే మిగిల్చినందుకా..? ముప్పై లక్షల మందిని మోసం చేసినందుకా?’ ఎందుకు ఈ సంబురాలు అని నిలదీశారు. కాంగ్రెస్ ప్రభుత్వం అధికారంలోకి వచ్చి రెండు సీజన్లు అయినా.. ఇంతవరకు రైతుభరోసా ఇవ్వలేదని ఆగ్రహం వ్యక్తంచేశారు. ‘జూన్లో వేయాల్సిన రైతుభరోసా.. జూలై వచ్చినా రైతుల ఖాతాలో వెయ్యలే.. కౌలు రైతులకు ఇస్తానన్న రూ.15 వేలు ఇయ్యనే ఇయ్యలే.. రైతు కూలీలకు.. రూ.12 వేల హామీ ఇంకా అమలే చెయ్యలేదు’ అని విమర్శించారు. కాంగ్రెస్ పాలన గురించి.. ఒక మాటలో చెప్పాలంటే.. ‘ఇంతకాలం.. అటెన్షన్ డైవర్షన్.. ఇప్పుడేమో.. ఫండ్స్ డైవర్షన్’ అని వ్యాఖ్యానించారు.