హైదరాబాద్, జూలై 11 (నమస్తే తెలంగాణ): ప్రభుత్వాన్ని ప్రశ్నిస్తున్నవారి తలలు, వీపులు పగలగొట్టడం, ప్రజలపై పోలీసులతో దాడులు చేయడమే ప్రజాపాలనా? అంటూ బీఆర్ఎస్ వర్కింగ్ ప్రెసిడెంట్ కే తారకరామారావు కాంగ్రెస్ పాలనపై నిప్పులు చెరిగారు. సోషల్మీడియాలో పోస్టులు పెడితే కూడా భరించలేని నిరంకుశ మనస్తత్వంతో ముఖ్యమంత్రి రేవంత్రెడ్డి వ్యవహరిస్తున్నారని మండిపడ్డారు. విధులు నిర్వర్తిస్తున్న జర్నలిస్టులపై పోలీసు దాడులు చేస్తూ ప్రభుత్వం దుర్మార్గంగా వ్యవహరిస్తున్నదని విమర్శించారు. గురువారం ఆయన బీఆర్ఎస్వీ నాయకులతో సమావేశమయ్యారు.
ఈ సందర్భంగా కేటీఆర్ మాట్లాడుతూ.. ఉద్యోగాలు, నోటిఫికేషన్ల గురించి అడిగినవారిని అవమానపరిచేలా రేవంత్రెడ్డి మాట్లాడుతున్నారని దుయ్యబట్టారు. ఇందుకు రేవంత్ క్షమాపణ చెప్పాలని డిమాండ్ చేశారు. రెండు లక్షల ఉద్యోగాల హామీని నెరవేర్చాలని డిమాండ్ చేస్తున్న నిరుద్యోగులు, విద్యార్థులకు రాజకీయాలను రేవంత్రెడ్డి అంటగడుతున్నారని మండిపడ్డారు. ప్రతిపక్షంలో ఉన్నప్పుడు రేవంత్రెడ్డితో సహా అనేకమందిని విద్యార్థులు కలిశారని, ఇప్పుడు ప్రతిపక్షంలో ఉన్న తమతోపాటు ఇతర పార్టీ నాయకులను కలుస్తున్నారని చెప్పారు.
విద్యార్థుల చుట్టూ చేరి వారిని ఎన్నికల కోసం వాడుకున్న రేవంత్రెడ్డి సన్నాసా? లేక అప్పుడు వారిని కలిసిన రాహుల్గాంధీ సన్నాసా? ముఖ్యమంత్రి సమాధానం చెప్పాలని సవాల్ విసిరారు. పాత అరాచకాల కాంగ్రెస్ పార్టీ మోసపూరితంగా కొత్త రూపంలో వచ్చిందనే విషయాన్ని ప్రజలు అర్థం చేసుకుంటున్నారని చెప్పారు. ఎన్నికల హామీలను అమలు చేయకపోగా, ఇప్పటికే ఉన్న సంక్షేమ పథకాలను కూడా రద్దు చేస్తున్నారని విమర్శించారు.
ఇదేమి అన్యాయమని అడిగినవారిపై కేసులు నమోదు చేస్తున్నారని మండిపడ్డారు. ప్రతిపక్షంలో ఉన్నప్పుడు ప్రైవేట్ విశ్వవిద్యాలయాలు వద్దన్న కాంగ్రెస్ పార్టీ, అధికారంలోకి రాగానే ఏడు కొత్త వాటికి అనుమతులు ఇచ్చిందని చెప్పారు. నాడు 50 వేల ఉద్యోగాలతో మెగా డీఎస్సీ విడుదల చేయాలని డిమాండ్ చేసిన రేవంత్రెడ్డి నేడు ఆ మాటే మర్చిపోయారని దుయ్యబట్టారు. 6 వేల ఉద్యోగాలే అదనంగా చేర్చి యువతను మోసం చేస్తున్నారని మండిపడ్డారు.
ప్రభుత్వానికి వ్యతిరేకంగా ఉద్యమిస్తున్న ప్రతి ఒక తెలంగాణ యువకుడు తెలంగాణ కథానాయకుడిగా నిలబడిపోతారని కేటీఆర్ పేర్కొన్నారు. కాంగ్రెస్ ప్రభుత్వం చేస్తున్న అన్యాయాన్ని విద్యార్థులు, నిరుద్యోగులు మర్చిపోరని హెచ్చరించారు. విద్యార్థులపై పోలీసులు చేస్తున్న దాడులను విద్యార్థి నాయకులు తమ డైరీలో నమోదు చేసుకుంటున్నారని పేర్కొన్నారు. విద్యార్థులపై, ప్రజలపై దాడులు చేస్తున్న పోలీస్ అధికారులను, తాము అధికారంలోకి వచ్చాక వదిలిపెట్టబోమని హెచ్చరించారు. బీఆర్ఎస్ ప్రభుత్వ హయాంలో 1.62 లక్షలకుపైగా ప్రభుత్వ ఉద్యోగాలను భర్తీ చేశామని, మరో 40 వేల ఉద్యోగాల భర్తీ ప్రక్రియ కొనసాగుతూ ఉండేదని చెప్పారు.
అందులోంచి 30 వేల ఉద్యోగాల నియామక పత్రాలను రేవంత్రెడ్డి ఇచ్చి తామే ఉద్యోగాలు ఇచ్చామని చెప్పుకుంటున్నారని ఎద్దేవా చేశారు. ప్రభుత్వం ఉద్యోగాల్లో 95% స్థానిక రిజర్వేషన్లు కల్పించామని చెప్పారు. పార్టీ విద్యార్థి విభాగం నుంచి అనేకమంది నాయకులకు ప్రజాప్రతినిధులుగా, చైర్మన్లుగా, మేయర్లుగా, జిల్లా స్థాయి అధ్యక్షులుగా అవకాశాలు కల్పించామని వివరించారు. నిజాయితీపరులు, దమ్మున్న నాయకులు బీఆర్ఎస్కు ఆస్తిగా ఉన్నారని చెప్పారు.
2009-2014 మధ్య తెలంగాణ కోసం విద్యార్థులు చేసిన పోరాటాలను ఇప్పటి విద్యార్థులకు చెప్పాలని సూచించారు. విద్యారంగంలో జరిగే ప్రతి అన్యాయంపై విద్యార్థి విభాగం ఆధ్వర్యంలో అందోళనలు కొనసాగాలని దిశానిర్దేశం చేశారు. సమావేశంలో ఎంపీ వద్దిరాజు రవిచంద్ర, బీఆర్ఎస్ నేత ఆర్ఎస్ ప్రవీణ్కుమార్, ఎమ్మెల్యే కల్వకుంట్ల సంజయ్కుమార్, ఎమ్మెల్సీ శంభీపూర్ రాజు, మాజీ ఎమ్మెల్యే బాల్క సుమన్, మాజీ ఎమ్మెల్సీ కర్నె ప్రభాకర్, బీఆర్ఎస్వీ రాష్ట్ర అధ్యక్షుడు గెల్లు శ్రీనివాస్యాదవ్, రాష్ట్ర ఉపాధ్యక్షుడు కడారి స్వామియాదవ్, తుంగ బాలు, పడాల సతీశ్ పాల్గొన్నారు.