కరీంనగర్ రూరల్, జూన్ 25: సింగరేణిని నిర్వీర్యం చేసేందుకు కేంద్రంలోని బీజేపీ సర్కార్ కుట్ర చేస్తున్నదని సీపీఐ రాష్ట్ర కార్యదర్శి, కొత్తగూడెం ఎమ్మెల్యే కూనంనేని సాంబశివరావు విమర్శించారు. మంగళవారం ఆయన కరీంనగర్లో మీడియాతో మాట్లాడారు. గనులను సింగరేణి ఆధ్వర్యంలోనే నడపాలని, ప్రైవేటీకరణ చేస్తే ఊరుకునేది లేదని హెచ్చరించారు. సింగరేణి ప్రైవేటీకరణపై ప్రధాని మోదీ పూటకో మాట మాట్లాడుతూ తప్పుదోవ పట్టిస్తున్నారని దుయ్యబట్టారు. ప్రధాని చెబుతున్న అబద్ధాలే కేంద్ర మంత్రి కిషన్రెడ్డి కూడా చెప్పడం దుర్మార్గమని అన్నారు. యూపీఏ ప్రభుత్వం ఇచ్చిన విభజన హామీలను బీజేపీ సర్కార్ తుంగలో తొక్కి రెండు రాష్ర్టాలకు తీరని అన్యాయం చేసిందని మండిపడ్డారు. రాష్ట్రంలోని బీజేపీ ఎంపీలకు తెలంగాణపై చిత్తశుద్ధి ఉంటే విభజన హామీల అమలు కోసం కేంద్రంపై ఒత్తిడి తేవాలని సూచించారు.