హైదరాబాద్ : మేడిగడ్డ బ్యారేజీ మొత్తం కుంగిపోయింది..కాళేశ్వరం (Kaleshwaram project)కొట్టుకుపోయింది అని కాంగ్రెస్ పార్టీ(Congress) వందల కొద్ది యూట్యూబ్ ఛానెళ్లు నెలల పాటు దుష్ప్రచారం చేశాయి. వాళ్ల కుల్లును, కుతంత్రాలును కడిగేస్తూ లక్షల క్యూసెక్కుల వరద నీరు నేడు మేడిగడ్డ వద్ద ప్రవహిస్తున్నదని, కాంగ్రెస్ కుట్రలను తట్టుకొని కాళేశ్వరం ప్రాజెక్టు నిలిచిందని మాజీ మంత్రి కొప్పుల ఈశ్వర్ (Koppula Eshwar) అన్నారు. సోమవారం కరీంనగర్లోని తన నివాసంలో మీడియా సమావేశంలో మాట్లాడారు.
తెలంగాణ రాష్ట్ర ఎదుగుదలని చూసి ఓర్వలేని సన్నాసులు ఎన్ని కుట్రలు చేసినా ఎప్పటికీ కాళేశ్వరం ప్రాజెక్టు తెలంగాణకు జీవధారగా మిగిలిపోతుందన్నారు. ప్రాజెక్ట్లపై అవగాహన లేకుండా కాంగ్రెస్ నేతలు మాట్లాడుతున్నారు. నీళ్ల ఉధృతిని బట్టి గెట్లు తెరవడం కాని, మూయడం కాని చేస్తారు. అంతే తప్పా ముఖ్యమంత్రి రేవంత్ రెడ్డి, మంత్రులు శ్రీధర్ బాబు, కోమటిరెడ్డి ఎవరో చెబితే గేట్లు తెరవడం కాని, మూయడం కాని చేయరన్నారు.
రాష్ట్ర ముఖ్యమంత్రికి విజ్ఞప్తి..
ఎండాకాలంలో ఏ బస్సులైతే ఏసుకుని మీరూ మీ సహచర మంత్రివర్గం కాళేశ్వరం ప్రాజెక్ట్ను కూల్చే యాత్ర కు పోయిర్రో..! అదే మంత్రి వర్గం మళ్లీ అవే బస్సులేసుకుని నేడు మరోసారి పర్యటన చేపట్టాలన్నారు. కాళేశ్వరం ప్రాజెక్ట్ నేటి పరిస్థితిని పరిశీలించాలని విజ్ఞప్తి చేశారు. అబద్దాలు చెప్పిన పాపానికి ఆ కాళేశ్వర గోదారమ్మ నీళ్లు నెత్తిన చల్లుకుని వస్తే కొద్దిలో కొద్దిగా పాప ప్రాయశ్చిత్తమైన కలుగుతుందన్నారు. కేసీఆర్ మీద కక్షతో కాళేశ్వరం మీద బురదజల్లే ప్రయత్నం ఎవరు చేసినా చరిత్ర హీనులుగా మిగిలిపోవడం ఖాయమన్నారు.