హైదరాబాద్, జూన్ 19 (నమస్తే తెలంగాణ): పేదపిల్లల కోసం రాష్ట్రంలో కేసీఆర్ బలోపేతం చేసిన గురుకులాలను ఎత్తివేస్తే బీసీ, ఎస్సీ, ఎస్టీ, మైనార్టీ విద్యార్థులకు అండగా బీఆర్ఎస్ ఆధ్వర్యంలో పోరాడుతామని మాజీ మంత్రి కొప్పుల ఈశ్వర్ స్పష్టంచేశారు. హైదరాబాద్ తెలంగాణ భవన్లో బుధవారం మీడియా సమావేశంలో ఆయన మాట్లాడారు. కేసీఆర్ మారు లేకుండా చేయాలన్న కుట్రలో భాగంగానే సీఎం రేవంత్రెడ్డి గురుకులాలను నిర్వీర్యం చేసేపనిలో ఉన్నారని ధ్వజమెత్తారు. దేశంలోని ఇతర రాష్ట్రాలకు మన గురుకులాలు ఆదర్శంగా నిలిచాయని గుర్తుచేశారు. రేవంత్రెడ్డి ఏదో స్టడీ రిపోర్ట్ పేరిట గురుకుల విద్యను ఛిన్నాభిన్నం చేయాలని ప్రయత్నిస్తున్నారని తెలిపారు. కేసీఆర్ హయాంలో పెద్దఎత్తున ఎస్సీలకు 238, బీసీలకు 261, ఎస్టీలకు 261, మైనార్టీలకు 204 గురుకులాలను స్థాపించారని వివరించారు. ఒక్కో విద్యార్థిపై గురుకుల పాఠశాలల్లో రూ.1.20 లక్షలకు పైనే కేసీఆర్ ప్రభుత్వంలో ఖర్చు చేసినట్టు తెలిపారు. పోటీ పరీక్షల్లో ప్రభుత్వ గురుకులాల విద్యార్థులు సత్తా చాటుతున్నారంటే అది కేసీఆర్ విధానాల ఫలితమేనని స్పష్టంచేశారు.
రెసిడెన్షియల్ సూళ్ల ఏర్పాటు తర్వాత ఉపాధ్యాయుల పోస్టుల భర్తీ జరిగిందని, గతంలో 3,575 మంది ఉపాధ్యాయులు ఉంటే ఇప్పుడు 17,439 మంది ఉన్నారని తెలిపారు. జూనియర్, డిగ్రీ గురుకుల కళాశాలలు కేసీఆర్ సీఎం అయ్యాకే భారీగా పెరిగాయని చెప్పారు. గురుకుల విద్యార్థులకు వివిధ పోటీ పరీక్షలకు కోచింగ్ ఇచ్చే వ్యవస్థను తీసుకొచ్చామని తెలిపారు. మన ఊరు మన బడి కేసీఆర్ హయాంలో పెట్టిన గొప్ప కార్యక్రమమని, అది కూడా కొనసాగిస్తారా? మూసేస్తారో? ప్రకటించాలని ప్రభుత్వాన్ని డిమాండ్ చేశారు. ఆరు గ్యారెంటీలను అమలు చేయకపోతే కాంగ్రెస్ నేతలకు ఏడు చెరువుల నీళ్లు తాగిస్తామని హుజూరాబాద్ ఎమ్మెల్యే పాడి కౌశిక్రెడ్డి హెచ్చరించారు. గ్రూప్-1 మెయిన్స్కు 1:100 చొప్పున ఎంపిక చేయాలని డిమాండ్ చేశారు. ఎమ్మెల్సీ జీవన్రెడ్డి మాజీ మంత్రి హరీశ్రావుపై చేసిన వ్యాఖ్యలను తీవ్రంగా ఖండిస్తున్నామని, గ్రూప్-1 నిర్వహణపై అవగాహన లేనిది జీవన్రెడ్డికేనని తెలిపారు. పట్టభద్రుల ఎమ్మెల్సీ పట్టభద్రులకు అన్యాయం చేసేలా మాట్లాడితే ఎట్లా అంటూ నిలదిశారు. సమావేశంలో మాజీ ఎమ్మెల్యే కోరుకంటి చందర్, బీఆర్ఎస్ నేత బొమ్మెర రామ్మూర్తి పాల్గొన్నారు.