హైదరాబాద్, జూన్ 28 (నమస్తే తెలంగాణ): రాష్ట్రంలో రుణమాఫీ అర్హులను వెంటనే ప్రకటించాలని మాజీ మంత్రి కొప్పుల ఈశ్వర్ డిమాండ్ చేశారు. శుక్రవారం తెలంగాణ భవన్లో ఆయన మాట్లాడుతూ రుణమాఫీపై వెంటనే విధివిధానాలు ప్రకటించాలని కోరారు. రాష్ట్రంలో గత పదేండ్లు కేసీఆర్ నాయకత్వంలో వ్యవసాయం పండుగలా మారితే, ప్రస్తుత కాంగ్రెస్ ప్రభుత్వం దండుగులా మార్చిందని మండిపడ్డారు. రైతుభరోసా డబ్బులు ఎప్పుడిస్తరో చెప్పాలని డిమాండ్ చేశారు.
ఎలాంటి షరతులు పెట్టకుండా వెంటనే నిధులు విడుదల చేయాలని కోరారు. ఇప్పటికే పంటల సాగు మొదలైందని, సీఎం రేవంత్ రెడ్డి క్యాబినెట్ సబ్ కమిటీ వేసి జూలై 15 లోగా నివేదిక ఇవ్వాలని చెప్పారని, అంటే అప్పటివరకు రైతు భరోసా ఇవ్వరా అని ప్రశ్నించారు. రైతుకు సాగులో ఆసరాగా ఉండేందుకు కేసీఆర్ ఈ పథకం ప్రవేశపట్టారని, కాంగ్రెస్ ప్రభుత్వం నాట్లు పూర్తయినా పెట్టుబడి సాయం అందించేలా లేదని మండిపడ్డారు. ఇచ్చిన హామీ మేరకు కౌలు రైతులకు సాయం ఎప్పుడు ఇస్తారో చెప్పాలని నిలదీశారు. వర్షాలు ఆలస్యమయ్యాయని, సాగునీటి కోసం ప్రభుత్వం ఎలాంటి చర్యలు తీసుకుంటుందో చెప్పాలని కోరారు. పండిన పంటకు రూ.500 బోనస్ ఇస్తామని చెప్పి, ఆచరణలో విఫలమయ్యారని మండిపడ్డారు. విత్తనాలకూ రైతులకు ఇబ్బందులు తప్పడం లేదని, చివరకు సీఎం నియోజకవర్గంలోనే నకిలీ విత్తనాలు విక్రయిస్తున్నారని విమర్శించారు.