హైదరాబాద్ : రాష్ట్రంలోని ప్రముఖ పుణ్యక్షేత్రమైన కొమురవెల్లి మల్లికార్జున స్వామి కల్యాణ మహోత్సవానికి ఏర్పాట్లు సిద్ధమయ్యాయి. కల్యాణ వేడుకను వైభవోపేతంగా నిర్వహించేందుకు ఆలయ అధికారులు అన్ని ఏర్పాట్లు చేశారు. వీరశైవ ఆగమన శాస్త్ర ప్రకారం గొల్ల కేతమ్మ మెడలాదేవీలతో.. మల్లన్న కల్యాణం తోట బావి వద్ద ఏర్పాటుచేసిన మండపంలో వివాహ వేడుక జరుగనున్నది. ప్రభుత్వం తరఫున ఆర్థిక, దేవాదాయశాఖ మంత్రులు హరీశ్రావు, అల్లోల ఇంద్రకరణ్రెడ్డి స్వామి, అమ్మవార్లకు పట్టువస్త్రాలు, తలంబ్రాలు స్వర్ణ కిరీటం సమర్పించనున్నారు.
తెలంగాణ రాష్ట్ర నలుమూలలతో పాటు మహారాష్ట్ర, ఛత్తీస్గఢ్ నుంచి భక్తులు తరలిరానున్నారు. ఈ మేరకు ఆలయ అధికారులు ఏర్పాట్లు చేశారు. మంచినీరు, చలువ పందిళ్లు, వాహనాల కోసం పార్కింగ్ స్థలాలు ఏర్పాట్లు చేశారు. ఏటా మార్గశిర మాసం చివరి ఆదివారం కొమురవెల్లి మల్లన్న కల్యాణం నిర్వహించడం ఆనవాయితీగా వస్తున్నది. కల్యాణం అనంతరం స్వామివారికి ఏకాదశ రుద్రాభిషేకం నిర్వహించి, భక్తులను స్వామివారి దర్శనానికి అనుతించనున్నారు. కల్యాణ మహోత్సవం సందర్భంగా సాయంత్రం 7 గంటలకు మల్లికార్జున స్వామి రథోత్సవం నిర్వహించనున్నారు. స్వామి వారికి స్వర్ణ కిరీటాన్ని మంత్రులు హరీశ్రావు, ఇంద్రకరణ్ రెడ్డి, ఎమ్మెల్యే ముత్తిరెడ్డి యాదగిరి రెడ్డి సమర్పించి, ఆ తర్వాత ముఖ మండపానికి ప్రారంభోత్సవం చేయనున్నారు.