హైదరాబాద్ సిటీబ్యూరో, ఏప్రిల్ 9 (నమస్తే తెలంగాణ): గాంధీ దవాఖానలో ఒకేరోజు ముగ్గురు రోగులకు ఖరీదైన ‘టోటల్ నీ రీప్లేస్మెంట్’ శస్త్రచికిత్సలు నిర్వహించి వైద్యులు రికార్డు సృష్టించారు. నర్సమ్మ(68), ఐలయ్య(65), ఎల్లయ్య(69) అనే వ్యక్తులు కొంతకాలంగా మోకాళ్ల నొప్పులతో బాధపడుతున్నారు. మోకాళ్లలోని గుజ్జుతోపాటు మోకాలి చిప్పలు పూర్తిగా అరిగిపోవటంతో నడవలేనిస్థితికి చేరుకొన్నారు. ప్రైవేటులో చికిత్స పొందే ఆర్థిక స్థోమత లేకపోవడంతో గాంధీ వైద్యులను ఆశ్రయించారు. పరీక్షలు నిర్వహించిన డాక్టర్లు శుక్రవారం ముగ్గురికి టోటల్ నీ రీప్లేస్మెంట్ శస్త్రచికిత్స చేశారు. ఒక్కో మోకాలి మార్పిడి శస్త్రచికిత్సకు ప్రైవేటులో సుమారు రూ.4 లక్షల వరకు ఖర్చు అవుతుందని గాంధీ దవాఖాన సూపరింటెండెంట్ డాక్టర్ రాజారావు, ఆర్థో విభాగాధిపతి డాక్టర్ రవీందర్ కుమార్ తెలిపారు. గాంధీ దవాఖానలో పైసా ఖర్చులేకుండా చేస్తున్నామని పేర్కొన్నారు. ఇప్పటి వరకు 18 మోకాళ్ల మార్పిడి శస్త్రచికిత్సలు నిర్వహించినట్టు చెప్పారు.