హైదరాబాద్, జూన్ 21 (నమస్తే తెలంగాణ): ప్రజాస్వామ్యబద్ధంగా ఎన్నికైన తమ ప్రభుత్వాన్ని కూల్చేస్తామంటూ ప్రతిపక్ష బీఆర్ఎస్, బీజేపీ ఏ సంఖ్యను చూసుకొని బెదిరిస్తున్నాయో అదే సంఖ్యను పెంచుకొనేందుకు తాము ఇతర పార్టీల ఎమ్మెల్యేలను చేర్చుకుంటున్నామని తెలంగాణ ప్రదేశ్ కాంగ్రెస్ కమిటీ (టీపీసీసీ) వర్కింగ్ ప్రెసిడెంట్, ఎమ్మెల్సీ మహేశ్కుమార్గౌడ్ చెప్పారు. కాంగ్రెస్ పార్టీలో చేరే వారు తమ ప్రభుత్వ విధానాలు నచ్చి చేరుతున్నారని అన్నారు.
గాంధీభవన్లో శుక్రవారం ఆయన మీడియాతో మాట్లాడుతూ పోచారం శ్రీనివాస్రెడ్డియే కాకుండా ఇంకా చాలామంది ఎమ్మెల్యేలు, ఎమ్మెల్సీలు కాంగ్రెస్ పార్టీలో చేరుతామని విన్నపాలు వస్తున్నాయని తెలిపారు. ఇంతకుముందే తాము చెప్పినట్టు ద్వారాలు తెరిస్తే బీఆర్ఎస్ ఖాళీ కావడం ఖాయమని అన్నారు.
కాంగ్రెస్ పార్టీలో చేరేందుకు 20 మంది బీఆర్ఎస్ ఎమ్మెల్యేలు లైన్లో ఉన్నారని ఖైరతాబాద్ ఎమ్మెల్యే దానం నాగేందర్ చెప్పారు. కాంగ్రెస్ పార్టీలో చేరబోయే ఎమ్మెల్యేలు వీరేనంటూ కొందరు ఎమ్మెల్యేల పేర్లు వెల్లడించారు. వారితో పార్టీ పెద్దల సంప్రదింపులు పూర్తయ్యాయని చెప్పారు. కాగా, రాజకీయాల్లో ఎమ్మెల్యే దానం చాప్టర్ క్లోజ్ అయినట్లేనని బీఆర్ఎస్ ఎమ్మెల్యే కేపీ వివేకానంద శుక్రవారం ఒక ప్రకటనలో తెలిపారు.