Uttam Kumar Reddy | హైదరాబాద్, జూలై 26 (నమస్తే తెలంగాణ): కాళేశ్వరం ప్రాజెక్టులోని 3 బరాజ్లు మినహా ప్రాజెక్టులోని మిగతా నీటి సరఫరా వ్యవస్థను అంతటినీ వినియోగిస్తామని, నీటి ఎత్తిపోతలను చేపడతామని రాష్ట్ర సాగునీటి పారుదలశాఖ మంత్రి ఉత్తమ్కుమార్రెడ్డి తెలిపారు. ప్రాజెక్టు వినియోగం అంశంలో నేషనల్ డ్యామ్ సేఫ్టీ అథారిటీ (ఎన్డీఎస్ఏ) సూచనల మేరకు ముందుకు వెళ్తున్నామని, ఆ మార్గదర్శకాలనే పాటిస్తామని తెలిపారు.
తుది రిపోర్టును ఇచ్చేవరకు మేడిగడ్డ, అన్నారం, సుందిళ్ల బరాజ్లను పూర్తిగా తెరచిపెట్టాలని, బరాజ్ల్లో నీటిని నిల్వ చేయకూడదని ఎన్డీఎస్ఏ స్పష్టంగా చెప్పిందని, అందుకు అనుగుణంగానే గేట్లను తెరిచి పెట్టామని వివరించారు. ఆ 3 బరాజ్లు మినహా మిగిలిన కాళేశ్వరం సిస్టమ్ మొత్తాన్ని ఈ సీజన్లో వాడుకుంటామని స్పష్టం చేశారు.
ఇప్పటికే ఎల్లంపల్లికి వరద వస్తున్నదని, ప్రాజెక్టు పూర్తి స్థాయి నీటిమట్టానికి చేరుకుంటున్నదని, రాబోయే రెండు, మూడ్రోజుల్లో నీటిని ఎత్తిపోతలను ప్రారంభిస్తామని తెలిపారు. ఎల్లంపల్లి నుంచి మిడ్మానేర్కు, అక్కడి నుంచి అనంతసాగర్, రంగనాయకసాగర్, మల్లన్నసాగర్కు తరలిస్తామని వివరించారు. ఈ సీజన్లో సాధ్యమైనంత మేరకు పంపులన్నీ ఆన్ చేసి నీటిని ఎగువ ప్రాంతాలకు తరలిస్తామని చెప్పారు.
కాళేశ్వరం ప్రాజెక్టు పంపింగ్ చేసి రిజర్వాయర్లను నింపాలని డిమాండ్ చేస్తూ బీఆర్ఎస్ వర్కింగ్ ప్రెసిండెంట్ కేటీఆర్, గులాబీ నేతల బృందం శుక్రవారం మేడిగడ్డ బరాజ్ను సందర్శించిన విషయం తెలిసిందే. దీంతో వెంటనే ప్రభుత్వం దిగొచ్చింది. సాగునీటి పారుదలశాఖ మంత్రి ఉత్తమ్కుమార్రెడ్డి జలసౌధలో శుక్రవారం సాయంత్రం ప్రత్యేకంగా మీడియా సమావేశం ఏర్పాటు చేసి మాట్లాడారు. పవర్పాయింట్ ప్రజంటేషన్ ద్వారా పలు అంశాలను వెల్లడించారు.
కాళేశ్వరం గురించి కాంగ్రెస్పై బీఆర్ఎస్ నేతలు గోబెల్స్ ప్రచారం చేస్తున్నారని ఆరోపించారు. ‘కమీషన్ల కోసం ప్రాణహిత చేవెళ్ల ప్రాజెక్టును రీడిజైన్ చేశారని, ఇప్పటికే రూ.94 వేల కోట్లు ఖర్చుచేసినా పనులు పూర్తి కాలేదు. పనులన్నీ పూర్తి కావాలంటే రూ.1 లక్ష 40 వేల కోట్లు ఖర్చు అవుతుంది. కేసీఆర్ ప్రభుత్వం ఇరిగేషన్ సెక్టార్ను సర్వనాశనం చేసింది. అధికారంలో ఉన్నా, ప్రతిపక్షంలో ఉన్నా బీఆర్ఎస్ నేతలు కాళేశ్వరాన్ని పిక్నిక్ స్పాట్ చేశారు’ అని వ్యాఖ్యానించారు. సమావేశంలో ఎమ్మెల్సీ జీవన్రెడ్డి, ఎమ్మెల్యేలు ఆది శ్రీనివాస్, మేడిపల్లి సత్యం, కవ్వంపల్లి సత్యనారాయణ తదితరులు పాల్గొన్నారు.
మంత్రి ఉత్తమ్కుమార్రెడ్డి మరోసారి తన అవగాహన రాహిత్యాన్ని బయటపెట్టుకున్నారు. మేడిగడ్డ బరాజ్లో నీటిని నిల్వ చేస్తే ఏదైనా ప్రమాదం జరిగితే సమ్మక్క సాగర్ బరాజ్ కొట్టుకుపోతుందని, 44 గ్రామాలు ముం పుబారిన పడతాయని, భద్రాచలం మునుగుతుందని అన్నారు. వాస్తవానికి మేడిగడ్డ బరాజ్ పూర్తిస్థాయి నీటినిల్వ సామర్థ్యం 16 టీఎంసీలు.
క్యూసెక్కుల్లో లెక్కగట్టినా దాదాపు 1,84,000 క్యూసెక్కులు. శుక్రవారం సాయంత్రం నాటికి మేడిగడ్డ బరాజ్ వద్ద 7.71 లక్షల క్యూసెక్కుల ప్రవాహం కొనసాగుతున్నది. అంత భారీ వరదకు నిలబడిన మేడిగడ్డ బరాజ్ స్వల్ప నీటిని నిల్వ చేసినంత మాత్రాన ఎలా దెబ్బతింటుందనేది అర్థం కాని విషయం. ఇక, ఇటీవల భద్రాచలం వద్ద 12 లక్షల క్యూసెక్కులకు మించి వరద ప్రవాహం కొనసాగింది. అయినా భద్రాచలం పట్టణానికి ఎలాంటి ముంపు వాటిల్లలేదు. మరి 1,84,000 క్యూసెక్కులకే ఎలా పట్టణం నీటమునుగుతుందో మంత్రికే తెలియాలి.
బరాజ్కు ఉపద్రవం వాటిల్లినా నీరు మొత్తం నదీమార్గంలోనే ఉంటుంది. మరి అలాంటప్పుడు గ్రామాలు ఎలా ముంపునకు గురవుతాయని సమావేశంలో పాల్గొన్న మీడియా ప్రతినిధులే కాదు.. అధికారులు సైతం విస్మయం వ్యక్తం చేశారు. మంత్రి అవగాహన రాహిత్యానికి నవ్వుకున్నారు. కాళేశ్వరం ప్రాజెక్టులో పంపులను తిప్పితే విద్యుత్తు కోసమే రూ.వేల కోట్లు ఖర్చు చేయాల్సి ఉంటుందని మరోసారి అవగాహనలేమితో మాట్లాడారు.
ప్రాజెక్టులోని పంపులన్నింటినీ ఒకేసారి వినియోగిస్తేనే ఆ మేరకు ఖర్చు వస్తుం ది తప్ప మరేమీ కాదు. అదీగాక ఎత్తిపోతల పథకాలకు కరెంటు ఖర్చు అనేది సహజం. కాళేశ్వరమే కాదు, కల్వకుర్తి, దేవాదుల, బీమా తదితర లిఫ్ట్ స్కీమ్లన్నీ అలాగే నడుస్తున్నాయి. ఇక 3 బరాజ్లు మినహా కాంగ్రెస్ ప్రతిపాదించిన ప్రాణహిత-చేవెళ్ల పథకానికి, కాళేశ్వరం ప్రాజెక్టుకు పెద్ద తేడా ఏమీ లేదు. విద్యుత్తు ఖర్చులు సైతం సమానమే. అయినా కాళేశ్వరంతో విద్యుత్తు ఖర్చులు అధికం అంటూ మంత్రి చేసిన వ్యాఖ్యలు విడ్డూరంగా ఉన్నాయని అధికారులు చర్చించుకున్నారు.