హైదరాబాద్, జూలై 25 (నమస్తే తెలంగాణ): కేసీఆర్ మాట్లాడినా.. మాట్లాడకపోయి నా వార్తే. అసెంబ్లీ సమావేశాలకు రాకపోయినా, వచ్చినా సంచలనమేనని చెప్పేందుకు గురువారం అసెంబ్లీ ప్రాంగణంలో నెలకొన్న వాతావరణమే నిదర్శనం. అసెంబ్లీ సమావేశాలకు గెజిట్ విడుదలైనప్పటి నుంచి రాష్ట్రవ్యాప్తంగా ఒకటే చర్చ. ‘ఈ సమావేశాలకు కేసీఆర్ హాజరవుతారా? లేదా?’ అని అన్నదానిపై ఆసక్తికరమైన చర్చ జరిగింది. మూడు రోజుల క్రితం తెలంగాణ భవన్లో జరిగిన బీఆర్ఎస్ పార్టీ శాసనసభాపక్ష సమావేశంలో కేసీఆర్ మాట్లాడుతూ ‘సమావేశాలకు నేనూ వస్తున్న. ప్రజల పక్షాన నిలబడి వారి సమస్యలను పరిష్కరించేదాకా ప్రభుత్వంపై రాజీలేని పోరాటం చేస్తా’ అని స్పష్టమైన ప్రకటన చేశారు. అయినప్పటికీ, సమావేశాలకు కేసీఆర్ రారనే ప్రచారం జరిగింది. దీనిని పటాపంచలు చేస్తూ గురువారం సభకు హాజరయ్యారు.
గురువారం నందినగర్లోని కేసీఆర్ నివాసం వద్ద వాన కురుస్తున్నా బీఆర్ఎస్ కార్యకర్తలు పెద్ద ఎత్తున చేరుకున్నారు. కేసీఆర్ బయటకు రాగానే బీఆర్ఎస్ శ్రేణులు, ఆయన అభిమానులు పూలు జల్లుతూ ‘జై తెలంగాణ’, ‘జై కేసీఆర్’ అంటూ నినాదాలు చేశారు. కేసీఆర్ వాహనానానికి దిష్టి తీశారు. కేసీఆర్ వెంట మాజీమంత్రి హరీశ్రావు, ఎమ్మెల్యే లు పల్లా రాజేశ్వర్రెడ్డి, కమలాకర్, లక్ష్మారెడ్డి, కౌశిక్రెడ్డి, గోపీనాథ్, మాజీ ఎమ్మెల్యేలు బాల్క సుమన్, జీవన్రెడ్డి తదితరులు ఉన్నారు.
ఇంటి నుంచి కేసీఆర్ బయలుదేరారనే విషయం తెలుసుకున్న మాజీ మంత్రులు, ఎమ్మెల్యేలు అసెంబ్లీ ప్రాంగణంలో ఆయనకు ఘనస్వాగతం పలికారు. అనంతరం ఆయన అసెంబ్లీ లాబీలోని తన చాంబర్లోకి వెళ్లారు. కేసీఆర్ రాకను తెలుసుకున్న అసెంబ్లీ కార్యదర్శి వీ నర్సింహాచార్యులు, చీఫ్ కరుణాకర్రెడ్డి ఆయనకు పుష్పగుచ్ఛం అందజేశారు. అనంతరం అసెంబ్లీ సమావేశ మందిరానికి వెళ్లారు.
సభలో బడ్జెట్ ప్రసంగం పూర్తికాగానే సమావేశ మందిరం నుంచి కేసీఆర్ బయటకు వచ్చా రు. కేసీఆర్ తన నివాసానికి వెళ్తారని అందరూ భావించారు. వాహనాన్నీ సిద్ధం చేశారు. అనూహ్యంగా ఆయన అసెంబ్లీ మీడియా పాయింట్కు వెళ్లారు. అక్కడ బడ్జెట్పై మీడియాతో మాట్లాడి, తిరిగి వాహనం దగ్గరికి వడివడిగా నడుచుకుం టూ వచ్చి అందరికీ అభివాదం చేస్తూ తన నివాసానికి బయలుదేరారు. కేసీఆర్ మీడియా పాయింట్ దగ్గరికి వెళుతున్నారనిగానీ, ఆయన మాట్లాడతారని గానీ, ఆయనకు ఇరువైలా ఉన్న నేతలెవరికీ అక్కడికి వెళ్లేదాకా తెలియకపోవడం గమనార్హం. ‘సార్ మీడియా పాయింట్కు వెళ్తారని అనుకోలేదు’ అని ఓ మీడియా ప్రతినిధి ఆశ్చర్యం వ్యక్తం చేస్తే.. పార్టీ కీలకనేత ఒకరు ‘దట్ ఈజ్ కేసీఆర్’ అని పేర్కొన్నారు.
తెలంగాణ రాష్ట్ర సారథిగా, దాదాపు పదేండ్లపాటు రాష్ర్టానికి ముఖ్యమంత్రిగా పనిచేసిన కేసీఆర్ గురువారం ఒక సాధారణ సభ్యుడిలా అసెంబ్లీలో వ్యవహరించారు. దశాబ్దకాలంపాటు ముఖ్యమంత్రిగా వ్యవహరించినా డాబూదర్పం ఇసుమంతైనా లేకుండా కనిపించారు. ఎమ్మెల్యేలతో చలాకీగా మాట్లాడారు. మీడియా పాయింట్ వద్ద ఆయన ఉల్లాసంగా ఉత్సాహంగా మాట్లాడారు. అసెంబ్లీ మీడియా పాయింట్లో కేసీఆర్లా ఉమ్మడి రాష్ట్రంలో మరే మాజీ ముఖ్యమంత్రులు మాట్లాడలేదని అసెంబ్లీ ప్రాంగణంలో చర్చించుకోవడం కనిపించింది.