Kamala Harris | వాషింగ్టన్, జూలై 22: అమెరికా అధ్యక్ష ఎన్నికల్లో డెమొక్రటిక్ పార్టీ అభ్యర్థిగా తనను అధ్యక్షుడు జో బైడెన్ ప్రతిపాదించడం గొప్ప గౌరవంగా భావిస్తున్నానని ఉపాధ్యక్షురాలు కమలా హారిస్ సోమవారం ఓ ప్రకటనలో పేర్కొన్నారు. పార్టీ తరపున అధ్యక్ష నామినేషన్ను సాధించి, ఎన్నికల్లో గెలుస్తానని ఆమె ఆశాభావం వ్యక్తం చేశారు. ఈ ఏడాది నవంబర్లో జరిగే అధ్యక్ష ఎన్నికల్లో రిపబ్లికన్ పార్టీ అభ్యర్థి డొనాల్డ్ ట్రంప్ను ఓడించడమే తన లక్ష్యమన్నారు.
ట్రంప్ను ఓడించడంలో దేశాన్ని ఏకం చేసేందుకు తన శాయశక్తులా కృషి చేస్తానని హారిస్ పేర్కొన్నారు. అధ్యక్ష ఎన్నికల బరిలో నుంచి తప్పుకొంటున్నట్టు బైడెన్ ఆదివారం ప్రకటించిన విషయం తెలిసిందే. ఈ సందర్భంగా ఆయన డెమొక్రటిక్ పార్టీ తరపున కొత్త అభ్యర్థినా కమలా హారిస్ పేరును ప్రతిపాదించారు. కాగా, అధ్యక్ష పొటీ నుంచి వైదొలుగుతున్నట్టు బైడెన్ ప్రకటించిన తర్వాత కమలా హారిస్ తొలి అధికారిక ప్రసంగం చేశారు. బైడెన్ గొప్ప నాయకుడని, ఆయన నాయకత్వానికి సాటిలేదని పేర్కొన్నారు.
బైడెన్ అధ్యక్ష ఎన్నికల నుంచి తప్పుకోవడంతో డెమొక్రటిక్ పార్టీ అభ్యర్థిగా రేసులో కమలా హారిస్ పేరు ప్రముఖంగా వినిపిస్తున్నది. అయితే పార్టీ నామినేషన్ విషయంలో ఆమెకు పలువురు డెమోక్రాట్ల నుంచి పోటీ ఎదురయ్యే అవకాశం కనిపిస్తున్నది. అధ్యక్ష నామినేషన్ రేసులో కెంటుక్కీ, నార్త్ కరోలినా, పెన్విల్వేనియా గవర్నర్లు అండీ బేషీర్, కూపర్, జోష్ షార్పియో, అరిజోనా సెనేటర్ మార్క్ కెల్లీ పేర్లు కూడా ప్రముఖంగా వినిపిస్తున్నాయి. ఇల్లినాయిస్, మిచిగాన్, కాలిఫోర్నియా గవర్నర్లు జేడీ ప్రిట్జ్కర్, గ్రెచెన్ విట్మర్, గవిన్ న్యూసోమ్లు కూడా రేసులో ఉన్నారు.