వరంగల్ చౌరస్తా, సెప్టెంబర్30: నకిలీ సర్టిఫికెట్లతో ఎంబీబీఎస్ సీటు పొందిన ఏడుగురు వైద్యవిద్యార్థుల అడ్మిషన్లను కాళోజీ హెల్త్ యూనివర్సిటీ రద్దు చేసింది. 2023-24 నీట్ పరీక్షలో అర్హత సాధించి, కాళోజీ హెల్త్ యూనివర్సిటీ ఇచ్చిన నోటిఫికేషన్ ఆధారంగా రిజిస్ట్రేషన్ సమయంలో నకిలీ స్టడీ సర్టిఫికెట్లను అప్లోడ్ చేసి స్థానిక కోటాలో సీట్లు పొందినట్టు వర్సిటీ అధికారులు నిర్ధారించారు. ఈ మేరకు వారి అడ్మిషన్లను రద్దు చేయడంతోపాటు తప్పుడు ధ్రువపత్రాలు సమర్పించినందుకు వరంగల్లోని మట్టెవాడ పోలీసులకు ఫిర్యాదు చేశారు.
ఏపీ చెందిన పోపుల సుబ్రహ్మణ్య సాయితేజ, వానిపెంట సాయిప్రీతికారెడ్డి, తమ్మినేని విష్ణుతేజారెడ్డి, అరికట్ల హనుమాన్రెడ్డి, టేకుపల్లి మహేశ్, గేర్లె భార్గవ ధర్మతేజ యశ్వంతనాయుడు, ఘట్కేసర్ ప్రాంతానికి చెందిన తన్నీరు సంజయ్ నకిలీ సర్టిఫికెట్లను అప్లోడ్ చేయగా, వారికి విజయవాడకు చెందిన కన్సల్టెంట్ నిర్వాహకుడు కామిరెడ్డి నాగేశ్వర్రావు సహకరించారు. విష్ణుతేజారెడ్డి, సంజయ్ విచారణకు హాజరైనట్టు సమాచారం. కామిరెడ్డి నాగేశ్వర్రావు విచారణకు హాజరైతే అసలు విషయాలు బయటపడుతాయి.