హైదరాబాద్, మార్చి 29 (నమస్తే తెలంగాణ): బీఆర్ఎస్ ప్రజల పార్టీ అని, అందుకే దానికంత ఆదరణ ఉన్నదని రాజ్యసభ సభ్యుడు కే కేశవరావు అన్నారు. కేసీఆర్ది దీవించబడిన కుటుంబమని, అందరినీ ఏకం చేసి తెలంగాణ ఉద్యమాన్ని నడిపించింది కేసీఆరేనని స్పష్టం చేశారు. శుక్రవారం హైదరాబాద్లోని తన నివాసంలో ఆయన మీడియాతో మాట్లాడారు. తాను నాడు కాంగ్రెస్ను, నేడు బీఆర్ఎస్ను ఎందుకు వీడాల్సి వచ్చిందో వివరించారు. తెలంగాణ కోసం విద్యార్థులు చనిపోతుంటే, కాంగ్రెస్ తెలంగాణ ఇవ్వటంలో తాత్సారం చేస్తున్న సమయంలో పార్టీకి, తనకు కొంత చెడిందని తెలిపారు. ఈ క్రమంలో కాంగ్రెస్ ఫోరమ్ ఫర్ తెలంగాణ (సీఎఫ్టీ) ఏర్పాటు చేశామని వెల్లడించారు. తెలంగాణ ఇవ్వకపోతే టీఆర్ఎస్లో చేరతానని సోనియాకు నేరుగా చెప్పానని అన్నారు. ప్రజల్లో కేసీఆర్ భారీస్థాయి ఉద్యమాన్ని తీసుకొస్తున్నారని, ఇవ్వకపోతే ఇబ్బందులు తలెత్తుతాయని కూడా సోనియాతో చెప్పినట్టు వివరించారు. తెలంగాణ ఉద్యమాన్ని కేసీఆర్ ముందుండి నడపటంతో కాంగ్రెస్ తెలంగాణ ఇచ్చిందని తెలిపారు.
దేశం గర్వించేలా తెలంగాణ అభివృద్ధి
స్వరాష్ట్రం సిద్ధించిన వెంటనే ‘తెలంగాణను పునర్మించాలి’ అని కేసీఆర్ పిలుపునిచ్చారని, ఆయన పిలుపు మేరకు టీఆర్ఎస్లో చేరానని కేకే చెప్పారు. కేసీఆర్ నాయకత్వంలో పదేండ్లలో తెలంగాణ దేశం మొత్తం గర్వించేలా గొప్పగా తయారైందని వెల్లడించారు. ఒకనాడు చాలా వెనుకబడిన ప్రాంతంగా ఉన్న తెలంగాణ.. నేడు అభివృద్ధి, జీడీపీ, తలసరి, కరెంటు, ఇరిగేషన్, వ్యవసాయం, ఐటీ ఎగుమతులు వంటి అన్ని రంగాల్లో మొదటిస్థానంలో ఉన్నదని వివరించారు. ఈ ఘనత కేసీఆర్దేనని, దాన్ని తాను మనస్ఫూర్తిగా అంగీకరిస్తున్నట్టు తెలిపారు. రాష్ర్టాన్ని ఇంత గొప్పగా అభివృద్ధి చేసినా, బీఆర్ఎస్ ఓడిందంటే నమ్మశక్యంగా లేదని, బాధగానూ ఉన్నదని అన్నారు. ఓటమికి గల కారణాలు కూడా తెలుసుకోవాలని సూచించారు.
సొంతింటికి వెళ్తున్నా
ఇన్నేండ్ల రాజకీయ తీర్థయాత్ర తర్వాత తాను సొంతగూటికి వెళ్లాల్సిన టైమ్ వచ్చిందని, ఆ ఘర్వాపసీ సమయం ఇదేనని కేకే అన్నారు. అందుకే కాంగ్రెస్లోకి వెళ్లాలని నిర్ణయం తీసుకున్నానని చెప్పారు. దేశంలో ప్రజాస్వామ్యం, కాంగ్రెస్ ప్రమాదంలో ఉన్నాయని అందుకే పార్టీ మారుతున్నట్టు తెలిపారు. తాను ఎప్పటికీ బీఆర్ఎస్ను గౌరవిస్తానని స్పష్టం చేశారు. తాను ఎక్కడున్న కాంగ్రెస్కు లాయల్టీగానే ఉన్నానని వెల్లడించారు. తెలంగాణ రావటం, అభివృద్ధి చెందటంలో ఎలాంటి అనుమానం లేదని స్పష్టం చేశారు. ‘85 ఏండ్ల వయసులో ఘర్వాపసీ అంటున్నారు. కాంగ్రెస్ అధికారంలో లేకపోతే వెళ్లేవారా?’ అని ఓ జర్నలిస్టు అడిగిన ప్రశ్నకు పొంతన లేని సమాధానం చెప్పారు. ఒకింత అసహనానికి గురయ్యారు.
కేసీఆర్ ఇచ్చిన మర్యాద ఎవ్వరివ్వలే
85 ఏండ్ల వయసులో, ప్రజాజీవితంలో 65 ఏండ్లుగా ఉన్న తనకు బీఆర్ఎస్ ఇచ్చినంత మర్యాద, కేసీఆర్ ఇచ్చినంత గౌరవం మరెవ్వరూ ఇవ్వలేదని కేకే చెప్పారు. బీఆర్ఎస్ కోసం పనిచేసే చాలామంది ఉన్నత విద్యావంతులు అని కొనియాడారు. కొత్తగా చేరిన ఆర్ఎస్ ప్రవీణ్కుమార్, తలసాని, కడియం, బాల్క సుమన్, క్రిశాంక్ వంటి ఎందరో విద్యావంతులు, పీహెచ్డీ చేసినవాళ్లు పార్టీలో ఉన్నారని తెలిపారు. ముఖ్యంగా కేసీఆర్, కేటీఆర్, హరీశ్ను ఎవ్వరూ చాలెంజ్ చేయలేరని స్పష్టం చేశారు. ‘వారు చాలా టాలెంటెడ్. వాళ్లు ఎప్పుడూ పనిలోనే నిమగ్నమవుతారు. 24 గంటలూ ఇచ్చిన పనిని పూర్తి చేయటంలోనే ఉంటారు’ అని కొనియాడారు. కాంగ్రెస్లోకి వెళ్తున్న విషయాన్ని కేసీఆర్కు చెప్పానని, ఆయన కూడా చాలా మర్యాదగా మాట్లాడుతూ కొన్ని రోజులు ఆగితే బాగుండు అని అన్నారని చెప్పారు. ‘నాకు కేసీఆర్, కేటీఆర్ చాలా మంచి చేశారు. నేను వారితో ఫైట్ చేయను. నేనేమైనా తప్పులు చేసుంటే క్షమించండి’ అని అన్నారు.