హైదరాబాద్, జూన్ 26 (నమస్తే తెలంగాణ): రాష్ట్రంలో జూనియర్ డాక్టర్ల మూడు రోజుల పోరాటానికి ప్రభుత్వం దిగివచ్చి డిమాండ్లను పరిష్కరించింది. దీంతో సమ్మెను విరమిస్తున్నట్టు జూనియర్ డాక్టర్ల అసోసియేషన్ బుధవారం ప్రకటించింది. హైదరాబాద్లోని మినిస్టర్స్ క్వార్టర్స్లో వైద్యారోగ్యశాఖ మంత్రి దామోదర రాజనర్సింహ మీడియా సమావేశం నిర్వహించారు. జూడాలు తనకు ఈ నెల 15న వినతిపత్రం అందించారని చెప్పారు. స్టయిపెండ్ను రూ.406 కోట్లు విడుదల చేశామని తెలిపారు. గాంధీ, ఉస్మానియా దవాఖానల్లో హాస్టళ్లు, కాకతీయ మెడికల్ కాలేజీలో రోడ్ల నిర్మాణానికి రూ.204 కోట్లకు పరిపాలన అనుమతులు మంజూరు చేశామని చెప్పారు. జూడాల చైర్మన్ సాయిహర్ష ప్రభుత్వానికి ధన్యవాదాలు తెలిపారు. హెల్త్ సెక్రటరీ క్రిస్టినా, డీఎంఈ వాణి పాల్గొన్నారు.
3 మెడికల్ కాలేజీలకు రూ. 204 కోట్లు
గాంధీ, ఉస్మానియా, కాకతీయ మెడికల్ కాలేజీల్లో వసతుల కల్పనకు వైద్యారోగ్యశాఖ రూ.204.85 కోట్లు కేటాయిస్తూ ఆరోగ్య శాఖ కార్యదర్శి క్రిస్టినా జడ్ చొంగ్తూ బుధవారం ఉత్తర్వులు జారీ చేశారు. ఉస్మానియాలో హాస్టళ్లకు రూ.121 కోట్లు, ఆధునీకరణకు రూ.50 లక్షలు, కృష్ణవేణి లేడీస్ హాస్టల్ సీసీ రోడ్లకు రూ.40 లక్షలు, గాంధీలో హాస్టళ్ల నిర్మాణానికి రూ.79.50 కోట్లు కేటాయించారు. కాకతీయ మెడికల్ కాలేజీలో అంతర్గత రోడ్ల నిర్మాణానికి రూ.2.75 కోట్లు, ఇతర ఖర్చులకు రూ.70 లక్షలు కేటాయించారు.