హైదరాబాద్, జూలై 24 (నమస్తే తెలంగాణ): హనుమకొండలో భారత రాష్ట్ర సమితి (బీఆర్ఎస్) కార్యాలయ నిర్మాణం కోసం ఎకరం స్థలాన్ని కేటాయించిన వ్యవహారంపై ఈ నెల 30న తీర్పు వెలువరిస్తామని హైకోర్టు ప్రకటించింది. ఆ స్థలంలో నిర్మాణాలను చేపట్టడంపై గత నెల 25న మున్సిపల్ డిప్యూటీ కమిషనర్ జారీచేసిన నోటీసులను సవాలు చేస్తూ హనుమకొండ జిల్లా బీఆర్ఎస్ అధ్యక్షుడు డీ వినయ్ భాసర్ దాఖలు చేసిన పిటిషన్పై జస్టిస్ కే లక్ష్మణ్ బుధవారం విచారణ జరిపారు. ప్రభుత్వం తరఫున అడ్వకేట్ జనరల్ ఏ సుదర్శన్రెడ్డి వాదిస్తూ.. బీఆర్ఎస్కు కేటాయించిన స్థలంలో కాకుండా మరో స్థలంలో నిర్మాణాలు చేపట్టినట్టు చెప్పారు. ఆ భూమికి ప్రత్యామ్నాయంగా వరంగల్ పశ్చిమ నియోజకవర్గ ఎమ్మెల్యే నాయిని రాజేందర్రెడ్డి ఇంటికి సమీపంలో మరో స్థలాన్ని కేటాయించాలని బీఆర్ఎస్ కోరిందని, దీనిపై ప్రభుత్వం ఇంకా ఎలాంటి నిర్ణయం తీసుకోకముందే ఆ పార్టీ నిర్మాణాలను చేపట్టిందని వివరించారు. వాస్తవానికి హనుమకొండలో బీఆర్ఎస్కు కేటాయించిన స్థలం కాకతీయ అర్బన్ డెవలప్మెంట్ కార్పొరేషన్ (కుడా) పరిధిలో ఉన్నదని తెలిపారు. దీంతో ఆ స్థలంలోని నిర్మాణాల ఫొటోలను పరిశీలించిన న్యాయమూర్తి.. ఈ నెల 30న తీర్పును వెలువరిస్తామని స్పష్టం చేశారు.