గద్వాల అర్బన్ :‘వైద్యులు విధులకు హాజరుకాకపోయినా రిజిస్టర్లో మాత్రం సంతకాలు ఉన్నాయి. ప్రస్తుతం ఒక్కరే డ్యూటీలో ఉన్నారు. మిగతా వారు ఎక్కడ? ఇది ప్రభుత్వ దవాఖాన? లేక ప్రైవేటుదా? అసలు సమయ పాలన వర్తించదా?’ అంటూ వైద్యులపై జిల్లా న్యాయమూర్తి జీ కవితాదేవి ఆగ్రహం వ్యక్తంచేశారు.
శనివారం జోగుళాంబ గద్వాల జిల్లా కేంద్రంలోని ప్రభుత్వ వైద్యశాలను ఆమె ఆకస్మిక తనిఖీ చేశారు. హాజరు పట్టికలో 38 మంది వైద్యులకుగాను 18 మంది సంతకాలు చేయగా, విధుల్లో ఒక్కరే ఉండటంతో ఆమె తీవ్ర అసహనం వ్యక్తం చేశారు. రోగులతో మాట్లాడి వైద్య సేవలు ఎలా అందుతున్నాయని అడిగి తెలుసుకున్నారు. డాక్టర్ల కోసం పడిగాపులు కాయాల్సి వస్తుందని, ఎప్పుడు వస్తారో.. ఎప్పుడు పోతారో తెలియని అయోమయ పరిస్థితి నెలకొన్నదని పలువురు రోగులు జడ్జి దృష్టికి తీసుకొచ్చారు.