Congress | జగిత్యాల, జూన్ 24, (నమస్తే తెలంగాణ): ‘200 కోట్ల రూపాయల నిధులు ఇచ్చి కండువా కప్పడం అవసరమా? ఇప్పుడు ప్రభుత్వానికి ఏమైంది? నా సీనియారీటి, సిన్సియార్టీకి ఇచ్చే విలువ ఇదేనా? కార్యకర్తల కష్టాలు, మనోభావాలు అక్కర్లేదా?’ అంటూ మంత్రి శ్రీధర్బాబు ఎదుట ఎమ్మెల్సీ జీవన్రెడ్డి ఆగ్రహం వ్యక్తం చేసినట్టు సమాచారం. జగిత్యాల బీఆర్ఎస్ ఎమ్మెల్యే సంజయ్కుమార్ను పార్టీలో చేర్చుకోవడంపై కినుక వహించిన జీవన్రెడ్డి ఎమ్మెల్సీ పదవికి రాజీనామా చేసేందుకు సిద్ధమయ్యారు. ఈ నేపథ్యంలో సోమవారం సాయంత్రం తన ఇంటికి వచ్చిన మంత్రి శ్రీధర్బాబుపై జీవన్రెడ్డి ఆగ్రహం వ్యక్తం చేసినట్లు తెలిసింది.ఈ క్రమంలో మంత్రి శ్రీధర్బాబు రెండుసార్లు ముఖ్యమంత్రి రేవంత్రెడ్డితో ఫోన్లో మాట్లాడండి అంటూ జీవన్రెడ్డిని కోరినా, ‘మాట్లాడను’ అంటూ తిరస్కరించినట్టు సమాచారం.
జగిత్యాల బీఆర్ఎస్ ఎమ్మెల్యే డాక్టర్ సంజయ్కుమార్ను పార్టీలో చేర్చుకోవడంపై కాంగ్రెస్ కార్యకర్తలు, నాయకులు వ్యక్తం చేసిన అభిప్రాయాలను పార్టీ చీఫ్ మల్లిఖార్జునఖర్గేకు తెలియజేస్తామని మంత్రి దుద్దిళ్ల శ్రీధర్బాబు తెలిపారు. జీవన్రెడ్డితో భేటీ అనంతరం మీడియాతో మాట్లాడుతూ జీవన్రెడ్డి ఉమ్మడి కరీంనగర్ జిల్లా కాంగ్రెస్ పార్టీకి పెద్ద దిక్కుగా ఉన్నారని, పార్టీ కష్టకాలంలో ఉన్న ప్రతీసారి పార్టీ మంచికోసం శ్రమించారని పేర్కొన్నారు. జీవన్రెడ్డికి ఏం హామీ ఇస్తున్నారని ప్రశ్నించగా, ‘జీవన్రెడ్డే మాకు పెద్దదిక్కు ఆయనకు మేం ఏం హామీ ఇస్తాం’ అని శ్రీధర్బాబు వ్యాఖ్యానించారు.
జగిత్యాల కాంగ్రెస్ పార్టీ కార్యకర్తలు, నాయకుల మనోభావాలకు అనుగుణంగానే తన భవిష్యత్ కార్యాచరణ ఉంటుందని కాంగ్రెస్ ఎమ్మెల్సీ జీవన్రెడ్డి స్పష్టం చేశారు. ప్రభుత్వం నిర్వహణ విషయంలో స్పష్టమైన మెజార్టీ ఉన్నప్పటికీ, సంఖ్యా బలం పెంచుకునేందుకు ఎమ్మెల్యేలను పార్టీలో చేర్చుకుంటున్నారని, అయితే చేర్చుకునే సమయంలో అక్కడి కార్యకర్తల మనోభావాలను సైతం పార్టీ పరిగణలోకి తీసుకోవాలని సూచించారు. పదేండ్లు ఎవరితో అయితే పోరాటం చేశామో అదే వ్యక్తిని పార్టీలో చేర్చుకోవడాన్ని కార్యకర్తలు, నాయకులు జీర్ణించుకోలేక పోతున్నారని తెలిపారు.