జనగామ, మే 16 (నమస్తే తెలంగాణ): చానల్ పేరుతో బ్లాక్ మెయిలింగ్, బెదిరింపులకు పాల్పడుతున్న తీన్మార్ మల్లన్న తెలంగాణకు నయా నయింలా తయారయ్యాడని జనగామ ఎమ్మెల్యే పల్లా రాజేశ్వర్రెడ్డి ఆరోపించారు. గురువారం వరంగల్-ఖమ్మం-నల్లగొండ జిల్లాల పట్టభద్రుల ఎమ్మెల్సీ బీఆర్ఎస్ అభ్యర్థి ఏనుగు రాకేశ్రెడ్డితో కలిసి జనగామలో బీఆర్ఎస్ ముఖ్య నాయకులు, పట్టభద్రుల సన్నాహాక సమావేశంలో ఆయన మాట్లాడారు.
‘పట్టభద్రుల ఎమ్మెల్సీ ఎన్నికల్లోనూ అనేక సందర్భాల్లో తీన్మార్ మల్లన్న నన్ను అనేక రకాల ఇబ్బందులు పెట్టాలని చూశాడు. తెలంగాణ రాకముందే నా భార్య నీలిమ ట్రాన్స్కోలో ఏఈగా ఉద్యోగంలో చేసి డీఈఈగా పనిచేస్తుంటే ఆమెకు కేసీఆర్ ఉద్యోగం ఇచ్చారని తప్పుడు ప్రచారం చేసి నా సంస్థల మీద ఇంటెలిజెన్స్, పోలీసులకు ఫిర్యాదులు చేయించాడు. వాళ్ల తమ్ముడిని పంపి 2 కోట్లు అడిగాడు. ఒక రూపాయి కూడా ఇవ్వను అని చెప్పా’ అని సంచలన వ్యాఖ్యలు చేశారు.
బిట్స్ పిలానీలో చదివిన ఉన్నత విద్యావంతుడు రాకేశ్రెడ్డిపై.. కాంగ్రెస్ చార్సౌబీస్ను నిలబెట్టిందని ఎద్దేవా చేశారు. విద్యావంతులు, మేధావులు ఆలోచించి రాకేశ్రెడ్డికి ఓటు వేయాలని కోరారు. ‘సచివాలయంలో సగానికిపైగా తెలంగాణ వారే పనిచేస్తున్నారు. కేసీఆర్ సాధించిన తెలంగాణ వల్లే ఇది సాధ్యమైంది. కాళేశ్వరంతో మన నీళ్లు మనకే వచ్చాయి. 3 నుంచి 9 లక్షల ఐటీ ఉద్యోగాలు, ఫార్మా, రియల్, మ్యానుఫ్యాక్చరింగ్ రంగాల ద్వారా మరో 16లక్షల ఉద్యోగాలు వచ్చాయి. 1.70 లక్షల ప్రభుత్వ ఉద్యోగాలు, పంచాయతీ సెక్రటరీలు, ఎస్సైలు కానిస్టేబుళ్లు, ఏఈవోలు, టీచర్లు, ఇంజినీర్లను నియమించింది బీఆర్ఎస్ ప్రభుత్వమే.
రేవంత్ చెప్పిన 30 వేల ఉద్యోగాలు ఇచ్చిందీ కేసీఆర్ ప్రభుత్వ హయాంలో భర్తీ చేసినవే’ అని వెల్లడించారు. రాకేశ్రెడ్డి మాట్లాడుతూ.. ‘నా ఎదుగుదల చూసి ఓర్వలేక బీజేపీలో నన్ను రాజకీయంగా హత్య చేశారు. కొనఊపిరితో ఉన్న నన్ను కేసీఆర్, కేటీఆర్, పల్లా చేరదీసి బీఆర్ఎస్లో మంచి అవకాశం ఇచ్చారు. పట్టభద్రుల ఎమ్మెల్సీగా గెలిచి కేసీఆర్కు ఈ స్థానాన్ని కానుకగా ఇస్తా’ అని వ్యాఖ్యానించారు. సమావేశంలో జడ్పీ, మున్సిపల్ చైర్పర్సన్లు భాగ్యలక్ష్మి, పోకల జమున, బీఆర్ఎస్ నాయకులు గద్దల నర్సింగరావు, ఇర్రి రమణారెడ్డి, ఎడవెల్లి క్రిష్ణారెడ్డి, మాజీ జడ్పీటీసీలు, ఎంపీపీలు, మున్సిపల్ కౌన్సిలర్లు, పట్టభద్రులు పాల్గొన్నారు.