హైదరాబాద్, జూన్ 26 (నమస్తే తెలంగాణ): బీఆర్ఎస్ పార్టీ టికెట్పై గెలిచి కాంగ్రెస్ పార్టీలో చేరిన ఎమ్మెల్యేలపై అనర్హత వేటు పడేదాకా విడిచిపెట్టబోమని మాజీ మంత్రి, ఎమ్మెల్యే జగదీశ్రెడ్డి తేల్చిచెప్పారు. పార్టీ ఫిరాయించిన ఎమ్మెల్యేలు పోచారం శ్రీనివాస్రెడ్డి, డాక్టర్ సంజయ్పై స్పీకర్ తక్షణమే చర్యలు తీసుకోవాలని డిమాండ్ చేశారు. తమ పిటిషన్ను స్వీకరించడానికి స్పీకర్ సమయం ఇవ్వకపోవటంతో తమకు ఉన్న మార్గాల ద్వారా ఆయనకు చేరవేశామని తెలిపారు.
తెలంగాణ భవన్లో బుధవారం మాజీ ఎమ్మెల్సీలు నారదాసు లక్ష్మణ్రావు, శ్రీనివాస్రెడ్డి, పార్టీ సీనియర్ నేత గ్యాదరి బాలమల్లు తదితరులతో కలిసి జగదీశ్రెడ్డి మీడియాతో మాట్లాడారు. బీఆర్ఎస్ పార్టీ టికెట్పై గెలిచిన ఎమ్మెల్యేలు పోచారం శ్రీనివాస్రెడ్డి, డాక్టర్ సంజయ్ని తక్షణమే అనర్హులుగా ప్రకటించాలని కోరేందుకు తాము స్పీకర్ను కలిసేందుకు మంగళవారం నుంచి ప్రయత్నిస్తున్నామని చెప్పారు. తమకు సమయం ఇచ్చే విషయాన్ని పరిశీలించి చెప్తానని స్పీకర్ ఫోన్లో సమాధానం ఇచ్చారని తెలిపారు.
కానీ మంగళవారం రాత్రి దాకా ఆయన నుంచి పిలుపు రాలేదని చెప్పారు. తిరిగి బుధవారం కూడా పలుమార్లు స్పీకర్ను కలిసేందుకు ప్రయత్నించగా.. ఆయన వికారాబాద్ పర్యటనలో ఉన్నట్టు స్పీకర్ ఓఎస్డీ సమాధానం ఇచ్చారని తెలిపారు. దీంతో ఎమ్మెల్యేలపై అనర్హత పిటిషన్ను స్పీకర్కు ఈ-మెయిల్ చేయటమే కాకుండా స్పీడ్పోస్ట్ ద్వారా కూడా పంపించామని, శాసనసభ కార్యాలయానికి సైతం తమ పిటిషన్ను పంపామని వివరించారు.
పార్టీ ఫిరాయింపుల చట్టం ప్రకారం ఎమ్మెల్యేలు పోచారం శ్రీనివాస్రెడ్డి, డాక్టర్ సంజయ్ సభ్యత్వం రద్దు కావల్సిందేనని, అప్పటిదాకా విడిచిపెట్టే ప్రసక్తేలేదని జగదీశ్రెడ్డి స్పష్టంచేశారు. కాంగ్రెస్ పార్టీ తన ఎన్నికల మ్యానిఫెస్టోలో పార్టీ ఫిరాయింపులకు పాల్పడకుండా పటిష్ఠమైన చట్టం తెస్తామని పేర్కొన్న విషయాన్ని గుర్తుచేశారు. కాంగ్రెస్ పార్టీ పాంచ్న్యాయ్ను ఆయన ఉదహరించారు. కాంగ్రెస్ పార్టీ మ్యానిఫెస్టోను ఆ పార్టీనే పాటించకపోతే దానికి విలువ ఉంటుందా? అని కాంగ్రెస్ ఎమ్మెల్సీ జీవన్రెడ్డి వంటివారే ప్రశ్నిస్తున్న అంశాన్ని ఈ సందర్భంగా గుర్తుచేశారు. స్పీకర్ తక్షణమే వారి సభ్యత్వాలను రద్దు చేయాలని డిమాండ్ చేశారు.
కాంగ్రెస్ పార్టీ ఎమ్మెల్యేలను చేర్చుకొనేందుకు తమ పార్టీ అధినేత కేసీఆర్ కండువా పట్టుకొని ఇల్లిల్లూ తిరగలేదని జగదీశ్రెడ్డి గుర్తుచేశారు. కాంగ్రెస్ పార్టీ టికెట్పై గెలిచిన ఎమ్మెల్యేల్లో చట్టప్రకారం 2/3 వంతు మంది స్వచ్ఛందంగా బీఆర్ఎస్లో చేరారని, దానికి దీనికి పోలిక ఉందా? అని ప్రశ్నించారు. తమ పార్టీ అధినేత కేసీఆర్ను కలిసేందుకు ప్రజాప్రతినిధులు, మాజీ ఎమ్మెల్యేలు, పార్టీ ప్రతినిధులే కాకుండా ప్రజలూ తండోపతండాలుగా వెళుతున్నారని చెప్పారు.