జమ్మికుంట, నవంబర్ 22: కరీంనగర్ జిల్లా జమ్మికుంట పట్టణంలోని ఆదిత్య కాట న్ మిల్లు వ్యాపార భాగస్వాములపై ఇన్కమ్ ట్యాక్స్(ఐటీ) శాఖ అధికారుల దాడులు బుధవారం రెండో రోజూ కొనసాగాయి. ఈ సోదాల్లో వారి ఆర్థిక లావాదేవీలు, బ్యాంకుల్లో నుంచి పెద్ద మొత్తంలో నగదు నిల్వ, బదిలీలు, విత్డ్రాలు, స్థిరాస్తి కొనుగోళ్లు, రుణాలు తదితర అంశాలపై ప్రశ్నించినట్టు సమాచారం. భూముల క్రయవిక్రయదారులు, రైతులు, వ్యాపారులను పిలిపించి.. కాటన్ క్రయవిక్రయాలకు సంబంధించిన రికార్డుల పరిశీలన, అకౌంట్ల నిర్వహణపై లోతుగా విచారిస్తున్నట్టు తెలిసింది. జమ్మికుంట పట్టణానికి చెందిన ప్రముఖ కాటన్ వ్యాపార భాగస్వాములు ముక్కా శివకుమార్, ముక్కా నారాయణ, బచ్చు భాస్కర్ తదితరుల మిల్లులు.. ఇండ్లపై కేంద్ర బలగాల సిబ్బంది బందోబస్తు మధ్య ఐటీ అధికారుల బృందం మంగళవారం ఉదయం నుంచి బుధవారం రాత్రి వరకూ ఏకకాలంలో సోదాలు చేస్తున్నది. తనిఖీల్లో ముక్కా శివకుమార్, ముక్కా నారాయణ ఇండ్లల్లో లెక్కా పత్రాల్లేని నగదు, బంగారు, వెండి వస్తువులు, స్థిరాస్తులకు సంబంధించిన పత్రాలు దొరికినట్టు తెలిసింది.