Telangana | రంగారెడ్డి, జూన్ 7 (నమస్తే తెలంగాణ): కొంతమంది రియల్టర్లు ప్రభుత్వ భూములను చెరబడుతున్నారు. ఇందుకు రెవెన్యూశాఖలోని ఇంటిదొంగలే ఊతమిస్తున్నారు. ముఖ్యంగా ‘ధరణి’ అపరేటర్లు బరితెగించి డిజిటల్ సంతకాలతో అక్రమాలకు ఆజ్యం పోస్తున్నారు. కలెక్టర్ల డిజిటల్ ‘కీ’ని ఉపయోగించి తప్పుడు పత్రాలతో ఈ-పాస్ పుస్తకాలను జారీ చేస్తున్నారు. గత అసెంబ్లీ ఎన్నికల సమయంలో ఏకంగా 98 ధరణి దస్ర్తాలకు దొడ్డిదారిన ఆమోదం తెలిపిన భూస్వాహాపర్వంపై ముమ్మర విచారణ జరుగుతున్నది. పోకల్వాడలో రూ.500 కోట్ల భూ స్కాం వం టి అక్రమాలు ఒక్కొక్కటిగా వెలుగు చూస్తున్నాయి. ధరణి ఆపరేటర్లపైనే ఆరోపణలు ఉండగా.. ఇందులో పెద్దల పాత్రపై వివిధ స్థాయిల్లో అంతర్గత విచారణ జరుగుతున్నది.
డిజిటల్ సంతకాల తాళంచెవి (కీ) అక్రమాలకు ఆజ్యం పోస్తున్నది. రంగారెడ్డి జిల్లాలో గత ఏడాది అక్టోబర్, నవంబర్లో 98 ఫైళ్లకు సంబంధించి ధరణిలో అక్రమ లావాదేవీలు జరిగినట్టు అప్పట్లో ఆరోపణలు వచ్చాయి. దీనికి ఊతమిచ్చేలా రెవెన్యూ అధికారులు ఆదిభట్ల పోలీస్స్టేషన్లో ఫిర్యాదు చేశారు. నిషేధిత జాబితాలో ఉన్న భూములకు సైతం రిజిస్ట్రేషన్లు జరిగాయి. కలెక్టర్ దగ్గర దీనికి సంబంధించి ‘కీ’ ఉండగానే ఈ వ్యవహారం చోటుచేసుకొన్నది. దీన్ని సీరియస్గా తీసుకున్న ప్రభుత్వం అప్పటి కలెక్టర్ భారతి హోళికేరిపై బదిలీవేటు వేసింది.
రంగారెడ్డి జిల్లాలో ‘ధరణి’ ముసుగులో జరిగిన అక్రమాలను తేల్చేందుకు వివిధ శాఖ లు సీరియస్గా విచారణను సాగిస్తున్నాయి. ప్రస్తుత కలెక్టర్ శశాంక.. ప్రత్యేకదృష్టి సారించారు. ప్రభుత్వ భూమికి పట్టాలను జారీచేసి పోకల్వాడలో హెచ్ఎండీఏ, ప్రైవేటు భూ ముల మధ్య ఉన్న రూ.500 కోట్ల విలువైన 5 ఎకరాల ప్రభుత్వ భూమిని కాజేసే ప్రయత్నాలకు అడ్డుకట్ట వేశారు. పోలీస్ శాఖ, సీసీఎల్ఏ, ఆర్థిక నేరాల విభాగం రంగంలోకి దిగి పక్కా ఆధారాలను సేకరిస్తూ సూత్రధారులను గుర్తించే పనిలో నిమగ్నమైనట్టు తెలిసింది. తహసీల్దార్ కార్యాలయం నుంచి విచారణ నివేదికలేవీ లేకుండానే కలెక్టరేట్లోని ధరణి డెస్క్లలో హక్కులు జారీ కావటం, హక్కులు కల్పించిన దస్ర్తాలకు సంబంధించి బ్యాకప్ పోర్టల్లో సమాచారం కనిపించకపోవటం వంటివి అధికారులకు విస్మయం కలిగిస్తున్నాయి. వాస్తవాలను కలెక్టరేట్ నుంచి అధికారులు సీసీఎల్ఏకు అందజేసినట్టు తెలిసిం ది. తప్పంతా ఆపరేటర్లదే అన్న ప్రచారం జరుగుతున్నా, పైస్థాయి అధికారుల ప్రమేయం కూడా ఉందన్న ఆరోపణలు వినిపిస్తున్నాయి.