న్యూఢిల్లీ, ఆగస్టు 15: భారత రైల్వేలో క్యాటరింగ్, టూరిజంతో పాటు రైల్వే టిక్కెట్ల రిజర్వేషన్ సేవలు అందించే ఐఆర్సీటీసీ పేరిట కొన్ని నకిలీ మొబైల్ యాప్లు చెలామణి అవుతున్నాయి. దీనిపై ప్రజలను అప్రమత్తం చేస్తూ ఐఆర్సీటీసీ ఒక ప్రకటన చేసింది. నకిలీ యాప్ల బారిన పడి మోసపోవద్దని హెచ్చరించింది.
కొందరు మోసగాళ్లు, సైబర్ నేరగాళ్లు ఆఫర్లు, ఉచితాలు అంటూ ఐఆర్సీటీసీ యాప్ పేరిట లింక్లు పంపిస్తూ డౌన్లోడ్ చేసుకొమ్మంటూ షేర్ చేస్తున్నారని, ఇవి డౌన్లోడ్ చేసుకుంటే నష్టపోతారని ఐఆర్సీటీసీ హెచ్చరించింది. మోసగాళ్ల బారిన పడవద్దని, తాము ఎలాంటి ఆఫర్లు ప్రకటించలేదని తమ యాప్ను గూగుల్ ప్లే స్టోర్, యాపిల్ యాప్ స్టోర్ నుంచి మాత్రమే డౌన్లోడ్ చేసుకోవాలని సూచించింది. యాప్ను డౌన్లోడ్ చేసుకొమ్మంటూ పంపిన ఎలాంటి లింక్ల జోలికి పోవద్దని విజ్ఞప్తి చేసింది.