ఇదీ దృశ్యం: సీఎం రేవంత్రెడ్డి సమక్షంలో జగిత్యాల ఎమ్మెల్యే సంజయ్కుమార్ కాంగ్రెస్ పార్టీలో చేరారు. ఆయన మెడలో సీఎం పార్టీ కండువా కప్పినప్పుడు ఒకవైపు మంత్రి పొంగులేటి శ్రీనివాస్రెడ్డి, మరోవైపు సీఎం సలహాదారు వేం నరేందర్రెడ్డి నిలుచున్నారు. ఈ చేరికతో సంబంధం లేని నిజామాబాద్కు చెందిన ఎమ్మెల్యే సుదర్శన్రెడ్డి ఆ సమయంలో అక్కడికి వెళ్లడంతో మీరు కూడా రండి అని మంత్రి పొంగులేటి పిలవడంతో వచ్చి నిలుచున్నారు.
ఉండాల్సిన దృశ్యం: ఉమ్మడి కరీంనగర్ జిల్లాకు చెందిన బీఆర్ఎస్ ఎమ్మెల్యే సంజయ్కుమార్ (జగిత్యాల) కాంగ్రెస్ తీర్థం పుచ్చుకుంటున్నప్పుడు ఆ జిల్లాకు చెందిన సీనియర్ నేతలు, మంత్రులు దుద్దిళ్ల శ్రీధర్బాబు, పొన్నం ప్రభాకర్తో పాటు మాజీమంత్రి, సీనియర్ నేత, ప్రస్తుత ఎమ్మెల్సీ జీవన్రెడ్డి అక్కడ ఉండాలి. జగిత్యాల నియోజకవర్గం కాంగ్రెస్ అభ్యర్థి జీవన్రెడ్డిపైనే బీఆర్ఎస్ తరఫున సంజయ్కుమార్ గెలుపొందారు.
వాస్తవానికి ఎమ్మెల్యే సంజయ్ కాంగ్రెస్ తీర్థం పుచ్చుకునే సమాచారం ఆ జిల్లాకు చెందిన మంత్రులు శ్రీధర్బాబు, పొన్నం ప్రభాకర్ ఇద్దరికీ తెలియదు. జగిత్యాల నియోజకవర్గంలో కాంగ్రెస్కు పెద్ద దిక్కుగా ఉన్న మాజీమంత్రి, ఎమ్మెల్సీ జీవన్రెడ్డికి కనీసం సమాచారం లేదు. ఆయనను తీవ్ర మనస్తాపానికి గురి చేసింది కూడా ఇదే. తన 40 ఏండ్ల రాజకీయ జీవితంలో జీవన్రెడ్డి కన్నీళ్లు పెట్టుకున్న సందర్భం మొదటిసారి.
CM Revanth Reddy | హైదరాబాద్, జూన్ 24 (నమస్తే తెలంగాణ): పీసీసీ అధినేత, సీఎం రేవంత్రెడ్డి సారథ్యంలో అసలు సిసలైన కాంగ్రెస్ నాయకులకు పార్టీలో, ప్రభుత్వంలో ఏపాటి గౌరవం ఉందో మచ్చుకు ఈ ఉదంతం ఒకటి చాలు. రేవంత్రెడ్డి నాయకత్వంలో నిజమైన కాంగ్రెస్ నాయకులకు ఈ అవమానాలు నిత్యకృత్యంగా మారాయి. నిన్నటికి నిన్న మాజీ స్పీకర్, బాన్సువాడ ఎమ్మెల్యే పోచారం శ్రీనివాస్రెడ్డి ఇంటికి సీఎం రేవంత్రెడ్డి వెళ్లి ఆయన మెడలో కాంగ్రెస్ కండువా కప్పినప్పుడూ ఇదే పరిస్థితి. ఉమ్మడి నిజామాబాద్ జిల్లాకు చెందిన కాంగ్రెస్ ఎమ్మెల్యేలకు కానీ, ఆ జిల్లాకు చెందిన సీనియర్ నేత, మాజీ మంత్రి, బోధన్ ఎమ్మెల్యే పీ సుదర్శన్రెడ్డికి కానీ సమాచారం లేదు. పైగా ఆయన పార్లమెంట్ ఎన్నికలకు నిజామాబాద్ ఇన్చార్జీగా కూడా ఉన్నారు. కడియం శ్రీహరి, ఆయన కుమార్తె కావ్య కాంగ్రెస్లో చేరిక సమయంలోనూ సేమ్ టు సేమ్. వారిని కాంగ్రెస్లో చేర్చుకోవడంపై మొదట ఉమ్మడి వరంగల్కు చెందిన కాంగ్రెస్ నాయకులంతా వ్యతిరేకించారు. సంజయ్కుమార్, పోచారం శ్రీనివాస్రెడ్డి, కడియం శ్రీహరి, దానం నాగేందర్ వీరి చేరికలు మచ్చుకే అయినప్పటికీ, ఇవి అధికార కాంగ్రెస్ పార్టీ ప్రస్తుత పరిస్థితికి అద్దం పడుతున్నాయి. డిప్యూటీ సీఎం భట్టి విక్రమార్కకు సైతం ఈ చేరికల గురించి సమాచారం ఉండడం లేదట. పార్టీలో చేరికల విషయం ఆయన కూడా టీవీల్లో చూసే తెలుసుకుంటున్నట్టు సమాచారం.
ఎందుకీ చేరికలు?
ఇప్పటికిప్పుడు ఎమ్మెల్యేలను చేర్చుకోవాల్సిన అనివార్య పరిస్థితి రాష్ట్రంలో లేదు. తన బలాన్ని నిరూపించుకోవాల్సిన అవసరం అధికార పార్టీకి లేదు. కాంగ్రెస్ పార్టీకి అసెంబ్లీలో పూర్తి మెజార్టీ ఉంది. అసెంబ్లీ సభ్యుల సంఖ్య ప్రకారం మ్యాజిక్ ఫిగర్ 60 మంది ఎమ్మెల్యేలు కాగా ప్రస్తుతం ఆ పార్టీకి అంతకంటే ఐదుగురు ఎక్కువే ఉన్నారు. మిత్రపక్షం సీపీఐతో కలిపి చూస్తే అవసరమైన సభ్యుల కంటే ఆరుగురు సభ్యులు ఎక్కువే. మరి అలాంటప్పుడు ఆరు గ్యారెంటీల అమలును కూడా పక్కన పెట్టి చేరికలపై రేవంత్రెడ్డి ఎందుకు దృష్టి కేంద్రీకరిస్తున్నారన్నదే ప్రశ్న.
రెండున్నర ఏండ్ల ఫార్ములా?
తెలంగాణ కంటే ముందు దక్షిణాదిలో కాంగ్రెస్ పార్టీ అధికార పగ్గాలు చేపట్టింది. అక్కడ సీఎం పోస్టుకు పీసీసీ అధ్యక్షుడు డీకే శివకుమార్, మాజీ సీఎం సిద్దరామయ్య తీవ్రస్థాయిలో పోటీ పడ్డారు. మధ్యేమార్గంగా కాంగ్రెస్ అధిష్ఠానం లోపాయికారీగా వీరిద్దరి మధ్య చెరో రెండున్నరేండ్లకు ఒప్పందం కుదిర్చినట్టు జాతీయ మీడియా కోడై కూసింది. అదే సీన్ తెలంగాణలోనూ రిపీట్ అయింది. సీఎం పోస్టుకు పీసీసీ అధ్యక్షుడు రేవంత్రెడ్డి, సీఎల్పీ నేత భట్టివిక్రమార్క పోటీ పడగా, కర్ణాటక తరహా ఫార్ములానే తెలంగాణలో అమలు చేయాలన్నది కాంగ్రెస్ అధిష్ఠానం ఆలోచనగా పార్టీ వర్గాల్లో ప్రచారం జరిగింది. ఈ నేపథ్యంలో సీఎంగా తన సీటును ఐదేండ్లపాటు పూర్తికాలం పదిల పరుచుకోవడానికి, పార్టీలో, ప్రభుత్వంలో తన బలం పెంచుకోవడానికి రేవంత్రెడ్డి ఇతర పార్టీల నుంచి ఎమ్మెల్యేలను చేర్చుకునే పనిలో పడ్డారని కాంగ్రెస్ వర్గాల్లో జోరుగా చర్చ జరుగుతున్నది. గతంలో తనతో పాటు టీడీపీలో ఉన్న సహచరులు అయితే విశ్వాసంగా ఉంటారని రేవంత్రెడ్డి ఆలోచనగా చెబుతున్నారు. టీడీపీలో తనతో కలిసి పనిచేసిన సీతక్క, తుమ్మల నాగేశ్వర్రావు ఇప్పటికే మంత్రివర్గంలో ఉన్నారు. పార్లమెంట్ ఎన్నికలకు ముందు కడియం శ్రీహరి, ఎన్నికల తర్వాత పోచారం శ్రీనివాస్రెడ్డిని కాంగ్రెస్లోకి తెచ్చుకోగలిగారు. పార్లమెంట్ ఎన్నికలకు ముందు మాజీ మంత్రి పట్నం మహేందర్రెడ్డి భార్య సునీతా మహేందర్రెడ్డికి ఎంపీ టికెట్ ఇచ్చి పార్టీలో చేర్చుకున్నప్పటికీ ఆమె విజయం సాధించలేకపోయారు.
కాంగ్రెస్పై తన ముద్ర
పార్టీపైనా, ప్రభుత్వంపైనా తన ముద్ర చెక్కుచెదరకుండా ఉండేందుకు దూరదృష్టితో రేవంత్రెడ్డి తన వ్యూహాన్ని అమలు చేస్తున్నట్టు రాజకీయ పరిశీలకులు అంచనా వేస్తున్నారు. సీఎం పదవి తప్ప తన మంత్రిమండలిపై రేవంత్రెడ్డికి పట్టులేదు. డిప్యూటీ సీఎం భట్టి విక్రమార్క, మంత్రులు దామోదర రాజనరసింహ, ఉత్తమ్కుమార్రెడ్డి, కోమటిరెడ్డి వెంకట్రెడ్డి, దుద్దిళ్ల శ్రీధర్బాబు, కొండా సురేఖ, జూపల్లి కృష్ణారావు, పొన్నం ప్రభాకర్ వీరంతా కాంగ్రెస్ పార్టీ భూమి పుత్రులే. కొత్తగా మంత్రులు అయిన సీతక్క, పొంగులేటి శ్రీనివాస్రెడ్డి, పూర్వశ్రమం టీడీపీలో సహచరుడు అయిన తుమ్మల నాగేశ్వర్రావు మాత్రమే తన వాళ్లుగా రేవంత్రెడ్డి విశ్వసిస్తున్నట్టు సమాచారం. ఇంతమంది కాంగ్రెస్ పాత కాపుల మధ్య ప్రస్తుత సీఎం సీటు, రాజకీయ భవిష్యత్తు సురక్షితం కాదనే విషయాన్ని రేవంత్రెడ్డి ముందుచూపుతో గ్రహించే చేరికలను ఉధృతం చేశారని అటు కాంగ్రెస్లో తలపండిన నేతలు, ఇటు రాజకీయ పరిశీలకు అంచనా వేస్తున్నారు. పైగా ఇటీవల జరిగిన పార్లమెంట్ ఎన్నికల ఫలితాలతో అధిష్ఠానం వద్ద రేవంత్రెడ్డి పరపతి కూడా తగ్గినట్టు పార్టీలో బలంగా వినిపిస్తున్నది. ఇప్పటికే పాత కాంగ్రెస్ మంత్రులంతా తనకు వ్యతిరేకంగా ఒక జట్టుగా తయారు అవుతున్నట్టు రేవంత్రెడ్డి అనుమానిస్తున్నట్టు సమాచారం. పార్లమెంట్ ఫలితాల అనంతరం అధిష్ఠానం వద్ద బలహీనపడిన రేవంత్, తదుపరి పీసీసీ అధ్యక్షుడి ఎంపికలో, మంత్రివర్గ విస్తరణలో తనకు విశ్వసపాత్రులైన వారికి చోటు లభించేలా వ్యూహత్మక అడుగులతో పావులు కదుపుతున్నట్టు సమాచారం.